空思念

《空思念》Khang Su-liām

江志豐Kang Tsì-hong

——————————————

坐踮椅條

tsē tiàm í-liâu

看遠遠的山

khuànn hn̄g-hn̄g ê suann

白頭知阮孤單

pe̍h-thâu tsai gún koo-tuann

心內的思念賰一半

sim-lāi ê su-liām tshun tsi̍t-puànn

莫非愛你漸漸空

bo̍k-hui ài lí tsiām-tsiām khang

新的花欉

sin ê hue-tsâng

開新的希望

khui sin ê hi-bāng

啥人為阮採花芳

siánn-lâng uī gún tshái hue-phang

過去的戀情

kuè-khì ê luân-tsîng

早已經謝

tsá í-king siā

偏偏為你閣留戀

phian-phian uī lí koh liû-luân

明知想你心頭亂

bîng-tsai siūnn lí sim-thâu luān

是空思念

sī khang su-liām

你的形影

lí ê hîng-iánn

離我愈來愈遙遠

lî guá jú lâi jú iâu-uán

敢講愛你是一場夢

kám-kóng ài lí sī tsi̍t-tiûnn bāng

夢醒了後阮才甘願

bāng-tshínn liáu-āu gún tsiah kam-guān

明知想你心頭亂

bîng-tsai siūnn lí sim-thâu luān

是空思念

sī khang su-liām

敢講註定

kám-kóng tsù-tiānn

結局予阮目箍紅

kiat-kio̍k hōo gún ba̍k-khoo âng

一生愛你遮重

it-sing ài lí tsiah tāng

也是無彩工

iā-sī bô-tshái-kang

對你無怨嘆

tuì lí bô uàn-thàn

只有空思念

tsí-ū khang su-liām