故鄉的氣味

《故鄉的氣味》Kòo-hiong ê Khì-bī

江志豐Kang Tsì-hong

——————————————

青青的山崙

tshinn tshinn ê suann-lūn

勾起思念的心

kau khí su-liām ê sim

飄飄的落葉

phiau-phiau ê lo̍h-hio̍h

吹向留戀的情

tshue hiòng liû-luân ê tsîng

攏藏佇雲底

lóng tshàng tī hûn-té

美麗的記持

bí-lē ê kì-tî

溫暖的日頭

un-luán ê ji̍t-thâu

照佇舊厝的塗墼邊

tsiò tī kū-tshù ê thôo-kat pinn

想著彼當時

siūnn-tio̍h hit-tong-sî

簡單幸福的歡喜

kán-tan hīng-hok ê huann-hí

廟口的夜市

biō-kháu ê iā-tshī

賣著烘番薯

bē tio̍h hang-han-tsî

大人泡茶開講

tuā-lâng phàu-tê khai-káng

囡仔含著柑仔蜜

gín-á kâm tio̍h kam-á-bi̍t

離開故鄉遮濟年

lī-khui kòo-hiong tsiah tsē nî

日思夜夢的聲音

ji̍t-su iā-bāng ê siann-im

總在夢中聽見

tsóng tsāi bāng-tiong thiann–kìnn

予人堅定的勇氣

hōo-lâng kian-tīng ê ióng-khì

曝粟的門口埕

pha̍k-tshik ê mn̂g-kháu tiânn

佈田的魚池

pòo-tshân ê hî-tî

彼是故鄉的氣味

hit sī kòo-hiong ê khì-bī