絕望

《絕望》Tsua̍t-bōng

甲子慧Kah-tsí Huī

——————————————

感情的背後

kám-tsîng ê puē-āu

阮是一个傷兵

gún sī tsi̍t-ê siong-ping

藏佇阮心內

tshàng tī gún sim-lāi

有偌濟傷痕

ū guā-tsuē siong-hûn

痛苦追殺阮的心

thòng-khóo tui-sat gún ê sim

無暝閣無日

bô mî koh bô ji̍t

逃亡度日

tô-bông tōo-ji̍t

一切攏無所謂

it-tshè lóng bû-sóo-uī

空心的熱情

khang-sim ê jia̍t-tsîng

早已經冷冰冰

tsá í-king líng ping-ping

孤單一粒心

koo-tuann tsi̍t-lia̍p sim

揣無永遠的岫

tshuē-bô íng-uán ê siū

受盡滄桑的命運

siū tsīn tshong-song ê miā-ūn

漂流再漂流

phiau-liû tsài phiau-liû

通緝的感情

thong-tsi̍p ê kám-tsîng

已經過期

í-king kuè-kî

一段情完全變味

tsi̍t-tuānn tsîng uân-tsuân piàn-bī

你是我傷心的敵人

lí sī guá siong-sim ê ti̍k-jîn

你的絕情阮看見

lí ê tsua̍t-tsîng gún khuànn–kìnn

忍著絕望的空喙

jím tio̍h tsua̍t-bāng ê khang-tshuì

無需要任何人安慰同情

bô su-iàu jīm-hô lâng an-uì tông-tsîng

何苦為愛來賭氣魄

hô-khóo uī ài lâi tóo khì-phik

放捒靈魂蹽落去

pàng-sat lîng-hûn liâu–lo̍h-khì

受的傷

siū ê siong

用一生

iōng it-sing

誰攏賠袂起

siáng lóng puê buē-khí