人生心情
《人生心情》Jîn-sing Sim-tsîng
王中平Ông Tiong-pîng
——————————————
人生是遮爾短
jîn-sing sī tsiah-nī té
偏偏為情來痴迷
phian-phian uī tsîng lâi tshi-bê
多情註定著心怨慼
to-tsîng tsù-tiānn-tio̍h sim uàn-tsheh
才會感受遮爾濟
tsiah ē kám-siū tsiah-nī tsuē
人情是喙脣皮
jîn-tsîng sī tshuì-tûn-phuê
何必講出心內話
hô-pit kóng-tshut sim-lāi uē
總是體會
tsóng-sī thé-huē
著囥心底
tio̍h khǹg sim-té
才袂怨嘆
tsiah bē uàn-thàn
所悟出的一切
sóo ngōo-tshut ê it-tshè
美麗多情的社會
bí-lē to-tsîng ê siā-huē
按怎會變甲遮爾濟
án-tsuánn ē piàn kah tsiah-nī tsuē
咱的感覺
lán ê kám-kak
出問題
tshut būn-tê
有長短
ū tn̂g-té
無論真真抑假假
bô-lūn tsin-tsin ia̍h ké-ké
無論啥人予人出賣
bô-lūn siánn-lâng hōo-lâng tshut-bē
若拊拊重來
nā hú-hú tîng-lâi
一場誤會
tsi̍t-tiûnn gōo-huē
人生是遮爾假
jîn-sing sī tsiah-nī ké
怎樣用心來交陪
tsuánn-iūnn iōng-sim lâi kau-puê
心情鬱卒是咱咧配
sim-tsîng ut-tsut sī lán teh phuè
才會體會現今的社會
tsiah ē thé-huē hiān-kim ê siā-huē