你是我所愛的人

《你是我所愛的人》Lí Sī Guá Sóo Ài ê Lâng

方瑞娥Png Suī-ngôo

——————————————

你是我的所愛的人

lí sī guá ê sóo ài ê lâng

世上最愛你一人

sè-siōng tsuè ài lí tsi̍t-lâng

當初因為你情意重

tong-tshue in-uī lí tsîng-ì tāng

予我為你心茫茫

hōo guá uī lí sim bâng-bâng

夢也夢著你一个人

bāng iā bāng-tio̍h lí tsi̍t-ê lâng

想也想著你一人

siūnn iā siūnn-tio̍h lí tsi̍t-lâng

現在我為你情意重

hiān-tsāi guá uī lí tsîng-ì tāng

暝日暗暗空思夢

mî-ji̍t àm-àm khang su-bāng

你是我的心肝

lí sī guá ê sim-kuann

你是我的性命

lí sī guá ê sìnn-miā

你是我的心肝性命

lí sī guá ê sim-kuann sìnn-miā

無你我無命

bô lí guá bô miā

你是我的所愛的人

lí sī guá ê sóo ài ê lâng

只有愛著你一人

tsí-ū ài-tio̍h lí tsi̍t-lâng

假使若無你一个人

khá-sú nā bô lí tsi̍t-ê lâng

我的一切無希望

guá ê it-tshè bô hi-bāng

你是我的心愛的人

lí sī guá ê sim-ài ê lâng

你著毋通交別人

lí tio̍h m̄-thang kau pa̍t-lâng

因為我毋願交別人

in-uī guá m̄-guān kau pa̍t-lâng

一直為你情意重

it-ti̍t uī lí tsîng-ì tāng

假使你若交別个人

khá-sú lí nā kau pa̍t-ê lâng

予我揣無你一人

hōo guá tshuē-bô lí tsi̍t-lâng

我希望著你仙毋通

guá hi-bāng tio̍h lí sian m̄-thang

這款才會害死人

tsit khuán tsiah ē hāi sí-lâng

你是我的月娘

lí sī guá ê ge̍h-niû

你是我的天星

lí sī guá ê thinn-tshinn

你是我的月娘天星

lí sī guá ê ge̍h-niû thinn-tshinn

無你我會死

bô lí guá ē sí

你是我的心愛的人

lí sī guá ê sim-ài ê lâng

千萬毋通愛別人

tshian-bān m̄-thang ài pa̍t-lâng

假使若無你一个人

khá-sú nā bô lí tsi̍t-ê lâng

我的前途無希望

guá ê tsiân-tôo bô hi-bāng