阮的故鄉是南投

《阮的故鄉是南投》Gún ê Kòo-hiong Sī Lâm-tâu

丁茵Ting In

——————————————

離開南投來都市

lī-khui Lâm-tâu lâi too-tshī

認真拍拚做生意

jīn-tsin phah-piànn tsuè sing-lí

講到內山就想起

kóng kàu lāi-suann tiō siūnn-khí

月娘猶是故鄉圓

ge̍h-niû iáu-sī kòo-hiong înn

風景極媠無地比

hong-kíng ki̍k suí bô-tè pí

地理中心佇埔里

tē-lí tiong-sim tī Poo-lí

日月潭是佇魚池

Ji̍t-gua̍t-thâm sī tī Hî-tî

神木上大是信義

sîn-bo̍k siōng tuā sī Sìn-gī

溪頭出名大學池

Khe-thâu tshut-miâ Tāi-ha̍k-tî

啊~我愛伊

ah~ guá ài i

中寮爽文龍眼仔味

Tiong-liâu Sóng-bûn lîng-gíng-á bī

名間蕹菜上搶市

Bîng-kan Ìng-tshài siōng tshiúnn-tshī

竹山出名紅番薯

Tik-san tshut-miâ âng-han-tsî

鹿谷凍頂小種仔氣

Lo̍k-kok Tàng-tíng sió-tsióng-á khuì

水里坑有天山梅

Tsuí-lí-khenn ū thian-san-muî

國姓草屯枇杷園

Kok-sìnn Tsháu-tûn pî-pê hn̂g

觀光列車集集線

kuan-kong lia̍t-tshia Tsi̍p-tsi̍p-suànn

國家公園佇玉山

kok-ka kong-hn̂g tī Gio̍k-suann

仁愛廬山有溫泉

Jîn-ài Lôo-san ū un-tsuânn

遮媠風景欲佗看

tsiah suí hong-kíng beh toh khuànn

伊是阮南投內山

i sī gún Lâm-tâu lāi-suann