破鏡重圓
《破鏡重圓》Phuà-kiànn Tîng-înn
丁黛Ting Tāi
——————————————
樹頂月娘光佮圓
tshiū-tíng ge̍h-niû kng kah înn
無雲滿天星
bô hûn muá-thinn tshinn
心情意爽天清清
sim-tsîng ì sóng thinn tshing-tshing
肅靜的月暝
siok-tsīng ê ge̍h-mî
無疑無悟阮佮伊
bô-gî-bô-ngōo gún kah i
會得閣相見
ē-tit koh sio-kìnn
心情無地通講起
sim-tsîng bô-tè thang kóng-khí
像今暗月圓
tshiūnn im-àm ge̍h înn
想起過去的代誌
siūnn-khí kè-khì ê tāi-tsì
像都市暗時
tshiūnn too-tshī àm-sî
迷人電燈光爍爍
bê-lâng tiān-ting kng sih-sih
也有紅佮青
iā ū âng kah tshinn
世間事事攏會變
sè-kan sū-sū lóng ē piàn
世情也稀奇
sè-tsîng iā hi-kî
歡喜無地通講起
huann-hí bô-tè thang kóng-khí
幸福再團圓
hīng-hok tsài thuân-înn
過去親像若眠夢
kè-khì tshin-tshiūnn ná bîn-bāng
目箍不時澹
ba̍k-khoo put-sî tâm
犧牲一切愛來放
hi-sing it-tshè ài lâi pàng
為著伊一人
uī-tio̍h i tsi̍t-lâng
神明也知阮輕重
sîn-bîng iā tsai gún khin-tāng
替阮咧毋甘
thuè gún teh m̄-kam
予阮重回鴛鴦夢
hōo gún tiông-huê uan-iunn bāng
美滿結成雙
bí-buán kiat-sîng-siang