七老八十

《七老八十》Tshit-lāu Pueh-tsa̍p
江蕙 Kang Huī
——————————————
若是有你陪伴
nā-sī ū lí puê-phuānn
我心安一半
guá sim an tsi̍t-puànn
咱的緣份天註定
lán ê iân-hūn thinn tsù-tiānn
毋通大聲細聲
m̄-thang tuā-siann sè-siann
講話著愛聽
kóng-uē tio̍h-ài thiann
疼某的人才會好命
thiànn bóo ê lâng tsiah-ē hó-miā

毋管柴米油鹽
m̄-kuán tshâ bí iû iâm
抑煮飯洗衫
ia̍h tsú-pn̄g sé-sann
為著你我攏甘願
uī-tio̍h lí guá lóng kam-guān
假使會當對我
ká-sú ē-tàng tuì guá
真心袂變卦
tsin-sim buē piàn-kuà
喔~我一生決定綴你行
ooh~ guá it-sing kuat-tīng tuè lí kiânn

有一工
ū tsi̍t kang
咱會愈來愈老
lán ē jú lâi jú lāu
老甲會愈行愈慢
lāu kah ē jú kiânn jú bān
有一句話
ū tsi̍t kù uē
緊講予你聽
kín kóng hōo-lí thiann
你的耳空驚會愈來愈重
lí ê hīnn-khang kiann ē jú lâi jú tāng

我會愛你的白頭鬃
guá ē ài lí ê pe̍h thâu-tsang
愛你愛到七老八十
ài lí ài kàu tshit-lāu pueh-tsa̍p
燒酒是愈陳愈芳
sio-tsiú sī jú tîn jú phang
咱的感情嘛著愛仝款
lán ê kám-tsîng mā tio̍h-ài kāng-khuán

我會愛你的白頭鬃
guá ē ài lí ê pe̍h thâu-tsang
愛你愛到七老八十
ài lí ài kàu tshit-lāu peh-tsa̍p
你的手
lí ê tshiú
我欲牽
guá beh khan
一世人
tsi̍t-sì-lâng