老唱盤

《老唱盤》Lāu Tshiùnn-puânn
朱海君 Tsu Hái-kun
——————————————
窗邊放著情歌的老唱盤
thang-pinn pàng tio̍h tsîng-kua ê lāu tshiùnn-puânn
速度總是三十三
sok-tōo tsóng-sī sann-tsa̍p-sann
心情轉來轉去
sim-tsîng tsuán lâi tsuán khì
時間過去
sî-kan kuè-khì
轉到三百三十三
tsuán kàu sann-pah sann-tsa̍p-sann

一个阿公時代的老唱盤
tsi̍t-ê a-kong sî-tāi ê lāu tshiùnn-puânn
流轉在悲歡之間
liû-tsuán tsāi pi-huan tsi-kan
講著一个故事
kóng tio̍h tsi̍t-ê kòo-sū
愛著人
ài-tio̍h lâng
心情註定會跳針
sim-tsîng tsù-tiānn ē thiàu-tsiam

老唱盤
lāu tshiùnn-puânn
轉啊轉啊
tsuán–ah tsuán–ah
轉著淚
tsuán tio̍h luī
譜出著
phóo tshut tio̍h
男男女女的愛情
lâm-lâm-lú-lú ê ài-tsîng
海誓山盟無意義
hái-sè san-bîng bô ì-gī
欺騙我自己
khi-phiàn guá tsū-kí
明明將你放袂記
bîng-bîng tsiong lí pàng-buē-kì

老唱盤
lāu tshiùnn-puânn
轉啊轉啊
tsuán–ah tsuán–ah
轉著淚
tsuán tio̍h luī
催我的目屎
tshui guá ê ba̍k-sái
點點滴落去
tiám-tiám tih–lo̍h-khì
想你抑是毋想你
siūnn lí ia̍h-sī m̄ siūnn lí
心袂當平靜
sim buē-tàng pîng-tsīng
歌聲陪我疼規暝
kua-siann puê guá thiànn kui-mî