先生名叫渭水

《先生名叫渭水》Sian-sinn Miâ Kiò Uī-suí
朱約信 Tsu Iok-sìn (豬頭皮 Ti-thâu-phuê)
——————————————
先生出身宜蘭街
sian-sinn tshut-sin Gî-lân-kue
開業佇咧大稻埕
khai-gia̍p tī-leh Tuā-tiū-tiânn
醫生館的名號大安
i-sing-kuán ê miâ hō Tāi-an
徛起佇臺北城
khiā-khí tī Tâi-pak-siânn

彼時日本咧管臺灣
hit-sî Ji̍t-pún teh kuán Tâi-uân
六三法咧奢颺
Lio̍k-sam-huat teh tshia-iānn
投入運動無推捒
tâu-ji̍p ūn-tōng bô the-sak
救島嶼的性命
kiù tó-sū ê sìnn-miā

先生出身宜蘭街
sian-sinn tshut-sin Gî-lân-kue
開業佇咧大稻埕
khai-gia̍p tī-leh Tuā-tiū-tiânn
醫生館的名號大安
i-sing-kuán ê miâ hō Tāi-an
徛起佇臺北城
khiā-khí tī Tâi-pak-siânn

為著臺灣設議會
uī-tio̍h Tâi-uân siat gī-huē
請願到東京
tshíng-guān kàu Tang-kiann
治警事件來受迫害啊
Tī-kíng Sū-kiānn lâi siū pik-hāi–ah
坐監三審定
tsē-kann sann-sím tiānn

文化協會的設立
Bûn-huà Hia̍p-huē ê siat-li̍p
鼓吹來牽成
kóo-tshui lâi khan-tsiânn
創設臺灣民眾黨
tshòng-siat Tâi-uân Bîn-tsiòng-tóng
堅心理念行
kian-sim lí-liām kiânn

故鄉臺灣啊
kòo-hiong Tâi-uân–ah
為伊前途來拍拚
uī i tsiân-tôo lâi phah-piànn
本名渭水啊
pún-miâ Uī-suí–ah
一生關心弱勢者
it-sing kuan-sim jio̍k-sè-tsiá