生活苦

《生活苦》Sing-ua̍h Khóo
白櫻Pi̍k-ing
——————————————
風雲變色風颱雨
hong-hûn piàn-sik hong-thai-hōo
煩惱翁婿海南島
huân-ló ang-sài Hái-lâm-tó
家內散三頓難度
ka-lāi sàn sann-tǹg lân tōo
細囝致病欲如何
suè-kiánn tì-pīnn beh jû-hô
望翁婿轉來照顧
bāng ang-sài tńg-lâi tsiàu-kòo
又驚遠路途
iū kiann hn̄g lōo-tôo
希望天共阮保護
hi-bāng thinn kā gún pó-hōo
緊轉來台灣島
kín tńg-lâi Tâi-uân-tó

自恨天地無公道
tsū hūn thinn-tuē bô kong-tō
自嘆烏暗阮前途
tsū thàn oo-àm gún tsiân-tôo
望翁婿轉來保護
bāng ang-sài tńg-lâi pó-hōo
無疑轉來無頭路
bô-gî tńg–lâi bô thâu-lōo
加一人予阮照顧
ke tsi̍t-lâng hōo gún tsiàu-kòo
目屎若落雨
ba̍k-sái ná lo̍h-hōo
甘願行來去拍拚
kam-guān kiânn lâi-khì phah-piànn
明明阮的命
bîng-bîng gún ê miā

紅燈青燈照酒廳
âng-ting tshinn-ting tsiò tsiú-thiann
假裝笑容接待兄
ké-tsng tshiò-iông tsiap-thāi hiann
鼻酒味心頭又驚
phīnn tsiú-bī sim-thâu iū kiann
環境支配逼阮行
khuân-kíng tsi-phuè pik gún kiânn
姑不將無顧名聲
koo-put-tsiong bô kòo miâ-siann
心肝不時疼
sim-kuann put-sî thiànn
結局是為翁為囝
kiat-kio̍k sī uī ang uī kiánn
才著遮歹命
tsiah tio̍h tsiah pháinn-miā