重慶北路的少年家

《重慶北路的少年家》Tiông-khìng Pak-lōo ê Siàu-liân-ke
王俊傑Ông Tsùn-kia̍t
——————————————
佇重慶北路三段的巷仔尾
tī Tiông-khìng Pak-lōo Sann-tuānn ê hāng-á bé
蹛著一个十七八歲的少年家
tuà tio̍h tsi̍t-ê tsa̍p-tshit-peh huè ê siàu-liân-ke
伊閒閒攏佇厝內底
i îng-îng lóng tī tshù lāi-té
猶有伊的阿媽佮伊做伙
iáu-ū i ê a-má kah i tsò-hué

佇重慶北路三段的巷仔尾
tī Tiông-khìng Pak-lōo Sann-tuānn ê hāng-á bé
少年家阿媽不時來共伊罵
siàu-liân-ke a-má put-sî lâi kā-i mē
遠遠共聽來
hn̄g-hn̄g kā thiann lâi
使人感動在心底
sú-lâng kám-tōng tsāi sim-té
是阿媽煩惱
sī a-má huân-ló
這个孫講出來的話
tsit-ê sun kóng tshut-lâi ê uē

樓頂的彼个少年家
lâu-tíng ê hit-ê siàu-liân-ke
伊頭殼內到底咧想啥貨
i thâu-khak lāi tàu-té teh siūnn siánn-huè
聽恁阿媽講你小可有問題
thiann lín a-má kóng lí sió-khuá ū būn-tê
你徛佇邊仔頭犁犁
lí khiā tī pinn–á thâu lê-lê

逐工透早攏會傳來一陣
ta̍k-kang thàu-tsá lóng ē thuân-lâi tsi̍t-tsūn
像唸歌閣若親像咧講話
tshiūnn liām-kua koh ná-tshin-tshiūnn leh kóng-uē
一直無法度共聽詳細
it-ti̍t bô-huat-tōo kā thiann siông-sè
這个少年家
tsit-ê siàu-liân-ke
你咧想啥貨
lí leh siūnn siánn-huè