跤踏車

《跤踏車》Kha-ta̍h-tshia
王識賢Ông Sik-hiân
———————————————-
踅來踅去
se̍h lâi se̍h khì
騎阮的跤踏車
khiâ gún ê kha-ta̍h-tshia
等待你下課
tán-thāi lí hā-khò
陪你每工做陣行
puê lí muí-kang tsuè-tīn kiânn
輕輕心內話
khin-khin sim-lāi uē
伴著車輪跤踏聲
phuānn-tio̍h tshia-lián kha-ta̍h siann
阮的希望攏寄佇遐
gún ê hi-bāng lóng kià tī hia

樹頂的鳥仔
tshiū-tíng ê tsiáu-á
不時來偷聽
put-sî lâi thau-thiann
聽咱談戀愛
thiann lán tâm luân-ài
快樂約會的心情
khuài-lo̍k iok-huē ê sim-tsiânn
阮的純情夢
gún ê sûn-tsîng bāng
為你每工囥佇遮
uī lí muí-kang khǹg tī tsia
歡歡喜喜
huann-huann-hí-hí
陪你做陣行
puê lí tsuè-tīn kiânn

踅啊踅啊踅
se̍h–ah, se̍h–ah, se̍h
踅著咱的愛
se̍h-tio̍h lán ê ài
踏啊踏啊踏
ta̍h–ah, ta̍h–ah, ta̍h
踏著青春佮期待
ta̍h-tio̍h tshing-tshun kah kî-thāi
甜蜜的滋味
tinn-bi̍t ê tsu-bī
摻著咱的愛
tsham-tio̍h lán ê ài
阮會永遠囥在心內
gún ē íng-uán khǹg tsāi sim-lāi