白布鞋

《白布鞋》Pe̍h Pòo-ê

王萊Ông Lâi

——————————————

半空中的風吹

puàn-khong-tiong ê hong-tshue

輕輕飛

khin-khin pue

自由自在

tsū-iû tsū-tsāi

若快樂的田嬰

ná khuài-lo̍k ê tshân-enn

有時懸有時低

ū-sî kuân ū-sî kē

飛天又鑽地

pue thinn iū tsǹg tē

無煩無惱

bô-huân-bô-ló

風中展姿勢

hong-tiong tián tsu-sè

感情路

kám-tsîng lōo

真感謝你來陪

tsin kám-siā lí lâi puê

有情人

ū-tsîng-lâng

心連心行仝齊

sim liân sim kiânn kāng-tsê

有時風有時雨

ū-sî hong ū-sî hōo

沃澹了衫褲

ak-tâm liáu sann-khòo

嘛沃袂澹彼雙白布鞋

mā ak buē tâm hit siang pe̍h pòo-ê

雖然是鞋面淡薄塗粉

sui-jiân sī ê-bīn tām-po̍h thôo-hún

我會輕輕掰

guá ē khin-khin pué

掰開情投意合愛的烈火

pué-khui tsîng-tâu-ì-ha̍p ài ê lia̍t-hué

毋驚日曝風吹

m̄-kiann ji̍t pha̍k hong tshue

毋驚冷規暝

m̄-kiann líng kui-mê

啊我就是你的溫柔被

ah~ guá tiō-sī lí ê un-jiû phuē

無論是鞋身偌濟傷痕

bô-lūn sī ê-sin guā-tsuē siong-hûn

我會輕輕洗

guá ē khin-khin sé

洗亮咱的山盟咱的海誓

sé liāng lán ê san-bîng lán ê hái-sè

感情若像白布鞋

kám-tsîng ná-tshiūnn pe̍h pòo-ê

愈穿愈牢底

jú tshīng jú tiâu-té

美麗愛情揣著好結尾

bí-lē ài-tsîng tshuē-tio̍h hó kiat-bué