無聲的感謝

《無聲的感謝》Bô-siann ê Kám-siā
王壹珊Ông It-san
——————————————
花若無落塗
hue nā bô lo̍h-thôo
就毋知露水寒
tiō m̄-tsai lōo-tsuí kuânn
船若無出帆
tsûn nā bô tshut-phâng
袂了解海上的孤單
buē liáu-kái hái-siōng ê koo-tuann

踮在冷冷風中
tiàm-tsāi líng-líng hong-tiong
阮的目箍漸漸紅
gún ê ba̍k-khoo tsiām-tsiām âng
天地遐爾闊
thinn-tē hiah-nī khuah
佗位是靠岸
tó-uī sī khò-huānn

一路行來
tsi̍t-lōo kiânn–lâi
無依無倚
bô-i-bô-uá
一步傷痕
tsi̍t-pōo siong-hûn
一步疼
tsi̍t-pōo thiànn
越頭看
ua̍t-thâu khuànn
才知你猶原徛佇遮
tsiah tsai lí iu-guân khiā tī tsia

想欲對你講出感謝
siūnn-beh tuì lí kóng tshut kám-siā
怎樣袂當講出聲
tsuánn-iūnn buē-tàng kóng tshut-siann
希望你會當聽著我
hi-bāng lí ē-tàng thiann-tio̍h guá
這句無聲的感謝
tsit kù bô-siann ê kám-siā