添丁發財
《添丁發財》Thiam-ting Huat-tsâi
王俊傑Ông Tsùn-kia̍t
——————————————
阮朋友怹阿公今年九十外
gún pîng-iú in a-kong kin-nî káu-tsa̍p-guā
細漢的時陣講是大尾鱸鰻
sè-hàn ê sî-tsūn kóng sī tuā-bué lôo-muâ
彼个時代做兄弟毋比這馬
hit-ê sî-tāi tsò hiann-tī m̄-pí tsit-má
人伊是重情重義閣重怹阿媽
lâng i sī tāng tsîng tāng gī koh tāng in a-má
聽講日本時代生活蓋硬篤
thiann-kóng Ji̍t-pún Sî-tāi sing-ua̍h kài ngē-táu
頂懸有夠壓霸
tíng-kuân ū-kàu ah-pà
下面閣出一陣走狗
ē-bīn koh tshut tsi̍t-tīn tsáu-káu
古意的鄉親予怹欺負到夠
kóo-ì ê hiong-tshin hōo in khi-hū kàu-kàu
嘛只有囥踮心內偷偷仔撟
mā tsí-ū khǹg tiàm sim-lāi thau-thau-á kiāu
夭壽喔
iáu-siū–ooh
這是啥物情形
tse sī siánn-mih tsîng-hîng
哪會烏佮白攏分袂清
ná ē oo kah pe̍h lóng hun buē tshing
腫頷喔
tsíng-ām–ooh
這是啥物情形
tse sī siánn-mih tsîng-hîng
哪會生理人你遮爾烏心
ná ē sing-lí-lâng lí tsiah-nī oo-sim
哭枵啦
khàu-iau–lah
這是啥物情形
tse sī siánn-mih tsîng-hîng
哪會攑頭我攏看無光明
ná ē gia̍h-thâu guá lóng khuànn-bô kong-bîng
僥倖喔
hiau-hīng–ooh
若閣遮爾酷刑
nā koh tsiah-nī khok-hîng
保庇恁半暝去拄著廖添丁
pó-pì lín puànn-mî khì tú-tio̍h Liāu Thiam-ting
一九四五年阿本仔離開臺灣
it-kiú sù-ngóo nî a-pún-á lī-khui Tâi-uân
怹阿公放一捾炮仔講有四樓懸
in a-kong pàng tsi̍t-kuānn phàu-á kóng ū sì-lâu kuân
想講閣來日子會較好討趁
siūnn-kóng koh-lâi ji̍t-tsí ē khah hó thó-thàn
所以趕緊娶怹阿媽來入洞房
sóo-í kuánn-kín tshuā in a-má lâi ji̍p tōng-pông
隔轉年阮朋友怹爸仔就來出世
keh-tńg-nî gún pîng-iú in pā-á tiō lâi tshut-sì
號名叫做添丁有兩層意義
hō-miâ kiò-tsuè Thiam-ting ū nn̄g-tsân ì-gī
望伊招小弟
bāng i tsio sió-tī
望伊行俠仗義
bāng i hîng-kiap tiōng-gī
因為換人統治
in-uī uānn lâng thóng-tī
日子並無較四序
ji̍t-tsí pīng bô khah sù-sī
嘐潲啦
hau-siâu–lah
這是啥物情形
tse sī siánn-mih tsîng-hîng
每個月總趁嘛攏無夠用
muí kò gue̍h tsóng thàn mā lóng bô-kàu īng
抗議啦
khòng-gī–lah
這是啥物情形
tse sī siánn-mih tsîng-hîng
人的厝共拆掉你欲按怎還
lâng ê tshù kā thiah-tiāu lí beh án-tsuánn hîng
壓霸啦
ah-pà–lah
這是啥物情形
tse sī siánn-mih tsîng-hîng
竟然麻衫褪予別人穿
kìng-jiân muâ-sann thǹg hōo pa̍t-lâng tshīng
無效啦
bô-hāu–lah
若閣遮爾酷刑
nā koh tsiah-nī khok-hîng
總有一工逐家攏變做廖添丁
tsóng ū tsi̍t-kang ta̍k-ke lóng piàn-tsò Liāu Thiam-ting
廖添丁夆刣死彼年二十六歲
Liāu Thiam-ting hông thâi–sí hit nî jī-tsa̍p-la̍k huè
是兄弟共創空去做抓耙
sī hiann-tī kā tshòng-khang khì tsò jiàu-pê
這件代誌予怹爸仔感慨真濟
tsit kiānn tāi-tsì hōo in pā-á kám-khài tsin tsē
社會烏暗利益永遠勝過烏白
siā-huē oo-àm lī-ik íng-uán sìng-kuè oo-pe̍h
阮朋友出世彼年時機足䆀
gún pîng-iú tshut-sì hit nî sî-ki tsiok bái
怹阿爸講海海人生人生海海
in a-pah kóng hái-hái jîn-sing jîn-sing hái-hái
既然毋是講情講義的時代
kì-jiân m̄-sī kóng-tsîng kóng-gī ê sî-tāi
添丁爸仔的後生阮朋友叫做發財
Thiam-ting pā-á ê hāu-senn gún pîng-iú kiò-tsuè Huat-tsâi
發財駛著伊的發財仔車
Huat-tsâi sái tio̍h i ê huat-tsâi-á tshia
南北二路四界去趁食
lâm-pak jī-lōo sì-kè khì thàn-tsia̍h
偏偏這馬毋但錢歹趁
phian-phian tsit-má m̄-nā tsînn pháinn thàn
油是貴甲鬼仔強欲掠
iû sī kuì kah kuí-á kiōng-beh lia̍h
發財駛著伊的發財仔車
Huat-tsâi sái tio̍h i ê huat-tsâi-á tshia
南北二路四界去趁食
lâm-pak jī-lōo sì-kè khì thàn-tsia̍h
偏偏這馬毋但錢歹趁
phian-phian tsit-má m̄-nā tsînn pháinn thàn
大細項物件攏嘛毋敢食
tuā-sè hāng mi̍h-kiānn lóng mā m̄-kánn tsia̍h
發財駛著伊的發財仔車
Huat-tsâi sái tio̍h i ê huat-tsâi-á tshia
南北二路四界去趁食
lâm-pak jī-lōo sì-kè khì thàn-tsia̍h
偏偏這馬毋但錢歹趁
phian-phian tsit-má m̄-nā tsînn pháinn thàn
連厝嘛攏無所在通好徛
liân tshù mā lóng bô sóo-tsāi thang-hó khiā
發財駛著伊的發財仔車
Huat-tsâi sái tio̍h i ê huat-tsâi-á tshia
南北二路四界去趁食
lâm-pak jī-lōo sì-kè khì thàn-tsia̍h
偏偏這馬毋但錢歹趁
phian-phian tsit-má m̄-nā tsînn pháinn thàn
納的稅閣予人提去烏白掖
la̍p ê suè koh hōo-lâng the̍h-khì oo-pe̍h iā
白賊啦
pe̍h-tsha̍t–lah
這是啥物問題
tse sī siánn-mih būn-tê
哪會逐項物件攏起遐濟
ná ē ta̍k hāng mi̍h-kiānn lóng khí hiah tsuē
白目喔
pe̍h-ba̍k–ooh
這是啥物問題
tse sī siánn-mih būn-tê
哪會趁錢無夠囡仔讀冊
ná ē thàn-tsînn bô-kàu gín-á tha̍k-tsheh
遐白痴
hiah pe̍h-tshi
這是啥物問題
tse sī siánn-mih būn-tê
哪會規工有人咧練痟話
ná ē kui kang ū-lâng teh liān-siáu-uē
落臺啦
lo̍h-tâi–lah
若閣踮遐哭爸
nā koh tiàm hia khàu-pē
莫怪四界攏是廖添丁的子弟
bo̍k-kuài sì-kè lóng-sī Liāu Thiam-ting ê tsú-tē
