孤單的跤踏

《孤單的跤踏》Koo-tuann ê Kha-ta̍h
王壹珊Ông It-san
——————————————
雨滴的聲
hōo tih ê siann
引阮心痛疼
ín gún sim thàng-thiànn
你欲離開彼暝
lí beh lī-khui hit mî
風雨遐爾大
hong-hōo hiah-nī tuā
看著你的形影
khuànn-tio̍h lí ê hîng-iánn
踏上彼幫公車
ta̍h tsiūnn hit pang kong-tshia
害阮一時毋知欲按怎
hāi gún tsi̍t-sî m̄-tsai beh án-tsuánn

無依無倚
bô-i-bô-uá
一枝小雨傘
tsi̍t-ki sió hōo-suànn
你送予我
lí sàng hōo guá
暗示愛情已落崎
àm-sī ài-tsîng í lo̍h-kiā
其實我嘛知影
kî-si̍t guá mā tsai-iánn
緣份已經到遮
iân-hūn í-king kàu tsia
雨水偏偏滴落在心肝
hōo-tsuí phian-phian tih lo̍h tsāi sim-kuann

離別後的今夜
lī-pia̍t āu ê kim-iā
阮猶原無心情
gún iu-guân bô-sim-tsiânn
攑著雨傘
gia̍h tio̍h hōo-suànn
身邊猶原
sin-pinn iu-guân
也是無半人來陪伴
iā-sī bô-puànn-lâng lâi puê-phuānn

怨嘆也是無較縒
uàn-thàn iā-sī bô-khah-tsua̍h
只有風雨才會了解我
tsí-ū hong-hōo tsiah ē liáu-kái guá
阮行起來成雙
gún kiânn–khí-lâi sîng-siang
其實是孤單的跤踏
kî-si̍t sī koo-tuann ê kha-ta̍h