人生親像夢

《人生親像夢》Jîn-sing Tshin-tshiūnn Bāng
王壹珊Ông It-san
——————————————
有人為著趁錢
ū-lâng uī-tio̍h thàn-tsînn
每日拚暝工
muí-ji̍t piànn-mê-kang
有人為著愛情
ū-lâng uī tio̍h ài-tsîng
心情袂輕鬆
sim-tsîng buē khin-sang
有人為著財產
ū-lâng uī-tio̍h tsâi-sán
兄弟變仇人
hiann-tī piàn siû-lâng
有人為著名聲
ū-lâng uī-tio̍h miâ-siann
想空閣想縫
siūnn khang koh siūnn phāng

毋免做閣食袂空
m̄-bián tsuè koh tsia̍h buē khang
這是逐家攏希望
tse sī ta̍k-ke lóng hi-bāng
跤踏實地照起工
kha ta̍h si̍t-tē tsiàu-khí-kang
海海人生
hái-hái jîn-sing
莫想較袂遐煩
mài siūnn khah buē hiah huân

人生親像夢
jîn-sing tshin-tshiūnn bāng
醒來猶原一場空
tshínn–lâi iu-guân tsi̍t-tiûnn khang
毋免計較
m̄-bián kè-kàu
毋免怨嘆
m̄-bián uàn-thàn
毋免煩惱百外項
m̄-bián huân-ló pah guā hāng
人生親像夢
jîn-sing tshin-tshiūnn bāng
花蕊凋謝會閣紅
hue-luí tiau-siā ē koh âng
等待機會
tán-thāi ki-huē
好好把握
hó-hó pá-ak
成功失敗由在人
sîng-kong sit-pāi iû-tsāi lâng