交際的條件

《交際的條件》Kau-tsè ê Tiâu-kiānn

四奇士合唱團Sù-kî-sū Ha̍p-tshiùnn-thuân

——————————————

若希望交著

nā hi-bāng kau tio̍h

一个純情的姑娘

tsi̍t-ê sûn-tsîng ê koo-niû

頭一步著愛表現

thâu-tsi̍t-pōo tio̍h-ài piáu-hiān

體貼佮溫柔

thé-thiap kah un-jiû

伊看你做人誠實

i khuànn lí tsuè-lâng sîng-si̍t

為伊肯犧牲

uī i khíng hi-sing

馬上就對你

má-siōng tiō tuì lí

獻出純真的愛情

hiàn-tshut sûn-tsin ê ài-tsîng

若希望交著

nā hi-bāng kau tio̍h

一个美麗的姑娘

tsi̍t-ê bí-lē ê koo-niû

頭一步面貌體格

thâu-tsi̍t-pōo bīn-māu thé-keh

相當好模樣

siong-tong hó bôo-iūnn

伊佮你做陣?迌

i kah lí tsuè-tīn thit-thô

毋驚人看衰

m̄-kiann lâng khuànn-sue

就會來真情對你

tsiū ē lâi tsin-tsîng tuì lí

講著好情話

kóng-tio̍h hó tsîng-uē

若希望交著

nā hi-bāng kau tio̍h

一个理智的姑娘

tsi̍t-ê lí-tì ê koo-niû

頭一步腦筋證明

thâu-tsi̍t-pōo náu-kin tsìng-bîng

學業有成就

ha̍k-gia̍p ū sîng-tsiū

伊看你有夠程度

i khuànn lí ū-kàu thîng-tōo

做伊好伴侶

tsuè i hó phuānn-lī

馬上來接受著

má-siōng lâi tsiap-siū tio̍h

你理想的建議

lí lí-sióng ê kiàn-gī

若希望交著

nā hi-bāng kau tio̍h

一个樸實的姑娘

tsi̍t-ê phoh-si̍t ê koo-niû

頭一步薰酒莫食

thâu-tsi̍t-pōo hun-tsiú mài tsia̍h

無行跳舞場

bô kiânn thiàu-bú-tiûnn

伊有你這款朋友

i ū lí tsit khuán pîng-iú

心情真快活

sim-tsîng tsin khuìnn-ua̍h

無論有啥物困難

bô-lūn ū siánn-mih khùn-lân

甘願來拖磨

kam-guān lâi thua-buâ

若希望交著

nā hi-bāng kau tio̍h

一个活潑的姑娘

tsi̍t-ê ua̍h-phuat ê koo-niû

頭一步娛樂方面

thâu-tsi̍t-pōo ngôo-lo̍k hong-bīn

每項愛研究

muí hāng ài gián-kiù

伊看你經驗豐富

i khuànn lí king-giām hong-hù

真愛出風頭

tsin-ài tshut-hong-thâu

自然會顛倒招你

tsū-jiân ē tian-tò tsio lí

絕對無退後

tsua̍t-tuì bô thuè-āu

若希望交著

nā hi-bāng kau tio̍h

一个虛華的姑娘

tsi̍t-ê hi-hua ê koo-niû

頭一步璇石瑪瑙

thâu-tsi̍t-pōo suān-tsio̍h bé-ló

準備兩三箱

tsún-pī nn̄g-sann siunn

伊知你心內希望

i tsai lí sim-lāi hi-bāng

快樂過春宵

khuài-lo̍k kè tshun-siau

一定會提出手段

it-tīng ē the̍h tshut tshiú-tuānn

對你獻妖嬌

tuì lí hiàn iau-kiau