碎心戀

《碎心戀》Tshuì Sim Luân
方瑞娥 Png Suī-ngôo
———————————–

明知袂當來做堆
bîng-tsai buē-tàng lâi tsuè-tui
偏偏才來愛著你
phian-phian tsiah lâi ài-tio̍h lí
事到如今欲怎樣
sū kàu jû-kim beh tsánn-iūnn
阮也毋敢做主張
gún iā m̄-kánn tsuè tsú-tiunn

你的真情佮真意
lí ê tsin-tsîng kah tsin ì
永遠毋敢放袂記
íng-uán m̄-kánn pàng buē-kì
今日才知離開你
kim-ji̍t tsiah tsai lī-khui lí
真是痛苦的代誌
tsin sī thòng-khóo ê tāi-tsì

明知佮你無緣份
bîng-tsai kah lí bô iân-hūn
心內為你亂紛紛
sim-lāi uī lí luān-hun-hun
怨嘆自己歹命運
uàn-thàn tsū-kí pháinn-miā-ūn
忍著痛苦含喙脣
jím-tio̍h thòng-khóo kâm tshuì-tûn

你也毋知阮身份
lí iā m̄-tsai gún sin-hūn
一直對阮來求婚
it-ti̍t tuì gún lâi kiû-hun
叫阮怎樣來允准
kiò gún tsánn-iūnn lâi ún-tsún
愈想心肝愈憂悶
jú siūnn sim-kuann jú iu-būn

你是有錢有地位
lí sī ū-tsînn ū tē-uī
阮是守寡有囝兒
gún sī tsiú-kuá ū kiánn-jî
明明知影配袂起
bîng-bîng tsai-iánn phuè bē khí
決心佮你拆分離
kuat-sim kah lí thiah hun-lī

轉來故鄉看囝兒
tńg-lâi kòo-hiong khuànn kiánn-jî
心內猶原思念你
sim-lāi iu-guân su-liām lí
叫阮怎樣活落去
kiò gún tsánn-iūnn ua̍h lo̍h-khì
傷心目屎點點滴
siong-sim ba̍k-sái tiám-tiám tih