曲跤撚喙鬚

《曲跤撚喙鬚》Khiau-kha Lián Tshuì-tshiu
方順吉Png Sūn-kiat
方宥心Png Iū-sim
蕭玉芬Siau Gio̍k-hun
——————————————
社會是溜溜鬚鬚
siā-huē sī liu-liu-tshiu-tshiu
萬事著靠目睭
bān-sū tio̍h khò ba̍k-tsiu
若無朋友
nā bô pîng-iú
通互相研究
thang hōo-siong gián-kiù
親像孤鳥揣無岫
tshin-tshiūnn koo-tsiáu tshuē-bô siū

拄著困難害了了
tú-tio̍h khùn-lân hāi-liú-liú
前途事業
tsiân-tôo sū-gia̍p
強欲化烏有
kiōng-beh huà oo-iú
這時陣死忠的
tsit sî-tsūn sí-tiong–ê
換帖鬥跤手
uānn-thiap tàu-kha-tshiú
你就妥當
lí tiō thò-tòng
閣曲跤撚喙鬚
koh khiau-kha lián tshuì-tshiu

朋友啊朋友
pîng-iú–ah pîng-iú
敬恁一杯酒
kìng lín tsi̍t-pue tsiú
有你我就免憂愁
ū lí guá tiō bián iu-tshiû