真快樂

https://www.youtube.com/watch?v=o0ifF0jDtDI&fbclid=IwAR2oLPMdlnjfVUAbGgILYh04rQwqag2ERxns_7BPiA44IxDyj300BUuZ9N8

《真快樂》Tsin Khuài-lo̍k
文夏 Bûn-hā
——————————————
真真真快樂
tsin, tsin, tsin khuài-lo̍k
真真真快樂
tsin, tsin, tsin khuài-lo̍k
夜市的人人
iā-tshī ê lâng-lâng
也會越頭看過來
iā ē ua̍t-thâu khuànn–kuè-lâi
青色的夜風
tshinn-sik ê iā-hong
也會越頭看過來
iā ē ua̍t-thâu khuànn–kuè-lâi
你我是一對鴛鴦
lí guá sī tsi̍t-tuì uan-iunn
青春的情侶
tshing-tshun ê tsîng-lī
今夜是我佮你的
kim-iā sī guá kah lí ê
熱戀的暗暝
jia̍t-luân ê àm-mî

來散步好抑毋好
lâi sàn-pōo hó ia̍h m̄-hó
來去跳舞
lâi-khì thiàu-bú
若無佮你來談情
nā-bô kah lí lâi tâm-tsîng
我真愛你
guá tsin ài lí
少年時也無兩回
siàu-liân-sî iā bô nn̄g-huê
盡量快樂
tsīn-liōng khuài-lo̍k
有你佮我做伴的
ū lí kah guá tsò-phuānn ê
月光暗暝
ge̍h-kng àm-mî

真真真快樂
tsin, tsin, tsin khuài-lo̍k
真真真快樂
tsin, tsin, tsin khuài-lo̍k
你佮我捀著酒杯
lí kah guá phâng tio̍h tsiú-pue
閣再來一回
koh-tsài lâi tsi̍t-huê
予我來看你笑容
hōo guá lâi khuànn lí tshiò-iông
閣再來一回
koh-tsài lâi tsi̍t-huê
你若是真正愛我
lí nā-sī tsin-tsiànn ài guá
閣再來一回
koh-tsài lâi tsi̍t-huê
為你來燒了性命
uī lí lâi sio liáu sìnn-miā
熱戀的暗暝
jia̍t-luân ê àm-mî

若想起一年以前
nā siūnn-khí tsi̍t-nî í-tsîng
也毋知你
iā m̄-tsai lí
若是想起半年前
nā-sī siūnn-khí puànn-nî tsîng
也毋知你
iā m̄-tsai lí
少年的你我兩个
siàu-liân ê lí guá nn̄g-ê
毋知怎樣
m̄-tsai tsuánn-iūnn
今日變成這款的
kim-ji̍t piàn-sîng tsit khuán–ê
啥人知影
siánn-lâng tsai-iánn

真真真快樂
tsin, tsin, tsin khuài-lo̍k
真真真快樂
tsin, tsin, tsin khuài-lo̍k
夜市的三更過了
iā-tshī ê sann-kinn kuè-liáu
只有我一个
tsí-ū guá tsi̍t-ê
佮你來分手了後
kah lí lâi hun-tshiú liáu-āu
只有我一个
tsí-ū guá tsi̍t-ê
甘蜜的一夜過了
kam-bi̍t ê tsi̍t-iā kuè-liáu
只有我一个
tsí-ū guá tsi̍t-ê
抱起著你的芳味
phō khí tio̍h lí ê phang-bī
我就欲轉去
guá tsiū beh tńg-khì

今夜的我
kim-iā ê guá
欲夢見你的形影
beh bāng-kìnn lí ê hîng-iánn
想欲佮你再見面
siūnn-beh kah lí tsài kìnn-bīn
踮在夢中
tiàm-tsāi bāng-tiong
若是袂夢見著你
nā-sī buē bāng-kìnn tio̍h lí
怎樣見你
tsuánn-iūnn kìnn lí
睏到夢見你的時
khùn kàu bāng-kìnn lí ê sî
才欲起來
tsiah beh khí-lâi