港邊相思曲

《港邊相思曲》Káng-pinn Siunn-si Khik
文雀Bûn-tsioh
——————————————
夜港邊夜風淒冷
iā káng-pinn iā-hong tshe-líng
孤單行到心暗茫
koo-tuann kiânn kàu sim àm bâng
聽見著夜鶯啼哭
thiann kìnn-tio̍h iā-ing thî-khàu
加添阮傷悲
ka-thiam gún siong-pi
今夜來看破著阮
kim-iā lâi khuànn-phuà tio̍h gún
彼時雙人的情份
hit-sî siang-lâng ê tsîng-hūn
雖然是明知
sui-jiân sī bîng-tsai
袂得閣再見著伊一面
buē-tit koh-tsài kìnn-tio̍h i tsi̍t-bīn
為怎樣
uī-tsuánn-iūnn
偏偏行到
phian-phian kiânn kàu
初戀的港邊
tshoo-luân ê káng-pinn

甘蜜的一場眠夢
kam-bi̍t ê tsi̍t-tiûnn bîn-bāng
過了留著心傷痕
kuè liáu lâu tio̍h sim siong-hûn
可憐的我的戀夢
khó-liân ê guá ê luân-bāng
隨波流盡去
suî pho lâu tsīn–khì
每日來思念著伊
muí-ji̍t lâi su-liām tio̍h i
一去無轉彼个人
tsi̍t-khì bô tńg hit ê lâng
夜夜來孤單徘徊
iā-iā lâi koo-tuann pâi-huê
初戀這个夜港邊
tshoo-luân tsit ê iā káng-pinn
夜鶯你敢袂艱苦
iā-ing lí kám buē kan-khóo
為我的苦戀
uī guá ê khóo-luân

思念你思念你啊
su-liām lí su-liām lí–ah
流著珠淚欲離開
lâu tio̍h tsu-luī beh lī-khui
悲哀的初戀港邊
pi-ai ê tshoo-luân káng-pinn
青春再會啦
tshing-tshun tsài-huē–lah
一切來當做過去
it-tshè lâi tòng-tsuè kuè-khì
我來行著我的路
guá lâi kiânn tio̍h guá ê lōo
悲慘的運命
pi-tshám ê ūn-miā
總是全部歸在著女性
tsóng–sī tsuân-pōo kui tsāi tio̍h lú-sìng
夜港邊只有留著
iā káng-pinn tsí-ū lâu tio̍h
可憐的戀夢
khó-liân ê luân-bāng