難忘的愛人

《難忘的愛人》Lân-bōng ê Ài-jîn
尤雅 Iû Ngá
——————————————
愛人啊我咧叫你
ài-jîn–ah guá teh kiò lí
你毋知有聽見無
lí m̄-tsai ū thiann kìnn–bô
自從咱離別了後
tsū-tsiông lán lī-pia̍t liáu-āu
時常思念你
sî-siông su-liām lí
一片真情
it-phiàn tsin-tsîng
望你毋通來袂記
bāng lí m̄-thang lâi buē-kì
期待一日閣一日
kî-thāi tsi̍t-ji̍t koh tsi̍t-ji̍t
可愛的愛人
khó-ài ê ài-jîn

愛人啊你佗位去
ài-jîn–ah lí tó-uī khì
天邊海角揣無你
thinn-pinn hái-kak tshē-bô lí
予阮每日空相思
hōo gún muí-ji̍t khang siunn-si
目屎像雨滴
ba̍k-sái tshiūnn hōo tih
一生幸福
it-sing hīng-hok
永遠只望你一人
íng-uán tsí bāng lí tsi̍t-lâng
無疑今日煞分離
bô-gî kim-ji̍t suah hun-lī
無緣的愛人
bô-iân ê ài-jîn

愛人啊你真無情
ài-jîn–ah lí tsin bô-tsîng
思思念念你一人
su-su-liām-liām lí tsi̍t-lâng
到底為著啥代誌
tàu-tué uī-tio̍h siánn tāi-tsì
放阮做你去
pàng gún tsuè lí khì
自咱離開了後
tsū lán lī-khui liáu-āu
無批又無信
bô phue iū bô sìn
傷心珠淚流無停
siong-sim tsu-luī lâu bô thîng
難忘的愛人
lân-bōng ê ài-jîn