期待的港口

《期待的港口》Kî-thāi ê Káng-kháu
尤君Iû Kun
——————————————
思念的可愛男性
su-liām ê khó-ài lâm-sìng
這陣毋知踮佗位
tsit-tsūn m̄-tsai tiàm tó-uī
海上英俊マドロス(船員)
hái-siōng ing-tsùn ma-lóo-lóo-su (tsûn-guân)
心中的愛人
sim-tiong ê ài-jîn
希望你會
hi-bāng lí ē
甜蜜批信寄來予我
tinn-bi̍t phue-sìn kià lâi hōo guá
我正是真正
guá tsiànn-sī tsin-tsiànn
純情等待你的人
sûn-tsîng tán-thāi lí ê lâng
每日黃昏踮港邊
muí-ji̍t hông-hun tiàm káng-pinn
等阮的船隻
tán gún ê tsûn-tsiah

心愛的趕緊轉來
sim-ài ê kuánn-kín tńg–lâi
永遠踮在我身邊
íng-uán tiàm-tsāi guá sin-pinn
海上漂浪マドロス(船員)
hái-siōng phiau-lōng ma-lóo-lóo-su (tsûn-guân)
心中的愛人
sim-tiong ê ài-jîn
請你著來了解
tshiánn lí tio̍h lâi liáu-kái
我的對你真情意
guá ê tuì lí tsin tsîng-ì
時常著來帶念
sî-siông tio̍h lâi tài-liām
咱的好情義
lán ê hó tsîng-gī
我是每日踮港邊
guá sī muí-ji̍t tiàm káng-pinn
等你的船隻
tán lí ê tsûn-tsiah

若想著你欲轉來
nā siūnn-tio̍h lí beh tńg–lâi
相逢日子真歡喜
siong-hông ji̍t-tsí tsin huann-hí
海上男兒マドロス(船員)
hái-siōng lâm-jî ma-lóo-lóo-su (tsûn-guân)
心中的愛人
sim-tiong ê ài-jîn
祈禱咱的幸福
kî-tó lán ê hīng-hok
將來會得願望
tsiong-lâi ē-tit guān-bāng
毋通來浪費
m̄-thang lâi lōng-huì
你咱寶貴時間
lí lán pó-kuì sî-kan
現在我是踮港邊
hiān-tsāi guá sī tiàm káng-pinn
看著你船隻
khuànn-tio̍h lí tsûn-tsiah