日落西山

《日落西山》Ji̍t-lo̍h Se-san
尤雅 Iû Ngá
——————————————
日落西山近黃昏
ji̍t-lo̍h se-san kīn hông-hun
心狂袂食急待君
sim-kóng buē tsia̍h kip thāi kun
想欲趕緊來接吻
siūnn-bueh kuánn-kín lâi tsiap-bún
也好增加咱情份
iā hó tsing-ka lán tsîng-hūn

如意郎君啊
jû-ì lông-kun–ah
最好正式來訂婚
tsuè-hó tsìng-sik lâi tīng-hun
好事免驚袂齊勻
hó-sū bián kiann buē tsiâu-ûn
又是天長配地久
iū-sī thian-tiông phuè tē-kiú
也袂辜負阮青春
iā buē koo-hū gún tshing-tshun

日落西山黃昏起
ji̍t-lo̍h se-san hông-hun khí
是阮好事相會時
sī gún hó-sū siong-huē sî
娘有多情哥有義
niû ū to-tsîng ko ū gī
祈願同心永同居
kî-guān tông-sim íng tông-ki

如意郎君啊
jû-ì lông-kun–ah
夜夜談情真歡喜
iā-iā tâm-tsîng tsin huann-hí
情重如山話投機
tsîng-tiōng jû-san uē tâu-ki
黃金雖然是寶物
n̂g-kim sui-jiân sī pó-mi̍h
也袂贏咱糖蜜甜
iā buē iânn lán thn̂g-bi̍t tinn

日落西山黃昏後
ji̍t-lo̍h se-san hông-hun āu
怎樣未到阮娘兜
tsuánn-iūnn buē kàu gún niû tau
較久也著愛等候
khah kú iā tio̍h ài tán-hāu
毋敢誤君空回頭
m̄-kánn gōo kun khang huê-thâu

如意郎君啊
jû-ì lông-kun–ah
所約著愛準時到
sóo-iok tio̍h-ài tsún-sî kàu
免阮肝火動心頭
bián gún kuann-huè tāng sim-thâu
一日經過一日老
tsi̍t-ji̍t king-kè tsi̍t-ji̍t lāu
青春毋通放水流
tshing-tshun m̄-thang pàng-tsuí-lâu