初戀的電話亭

《初戀的電話亭》Tshoo-luân ê Tiān-uē-tîng
尤鳳Iû Hōng
——————————————
伊怎樣全然無來了解
i tsánn-iūnn tsuân-jiân bô lâi liáu-kái
女性的心情
lú-sìng ê sim-tsîng
害著阮為伊
hāi-tio̍h gún uī i
煞來珠淚滴胸前
suah lâi tsu-luī tih hing-tsîng
彼一日雙人來約會
hit-tsi̍t-ji̍t siang-lâng lâi iok-huē
踮在初戀電話亭
tiàm-tsāi tshoo-luân tiān-uē-tîng
真拄好遇著早前
tsin-tú-hó gū-tio̍h tsá-tsîng
無緣彼个人
bô-iân hit ê lâng
不應該不應該
put ìng-kai put ìng-kai
不應該誤會阮
put ìng-kai gōo-huē gún
是愛情無專的女性 啊~
sī ài-tsîng bô tsuan ê lú-sìng ah~

自彼日佮伊離開
tsū hit-ji̍t kah i lī-khui
踮在初戀電話亭
tiàm-tsāi tshoo-luân tiān-uē-tîng
害著阮凝心
hāi-tio̍h gún gîng-sim
目睭金金看天頂
ba̍k-tsiu kim-kim khuànn thinn-tíng
天星也袂得來同情
thinn-tshinn iā buē-tit lâi tông-tsîng
一个女性的不幸
tsi̍t-ê lú-sìng ê put-hīng
只有是輕輕叫著
tsí-ū sī khin-khin kiò tio̍h
思慕彼个人
su-bōo hit ê lâng
轉來啦轉來啦
tńg–lâi lah tńg–lâi lah
倒轉來
tò-tńg–lâi
毋通害阮為你
m̄-thang hāi gún uī lí
夜夜來失眠 啊~
iā-iā lâi sit-bîn ah~

心傷悲
sim siong-pi
慢慢行到
bān-bān kiânn kàu
你咱初戀電話亭
lí lán tshoo-luân tiān-uē-tîng
為著伊見景傷情
uī-tio̍h i kiàn-kíng siong-tsîng
也是無路用
iā-sī bô-lōo-īng
想著欲來敲著電話
siūnn tio̍h bueh lâi khà tio̍h tiān-uē
叫伊會得來同情
kiò i ē-tit lâi tông-tsîng
我心內一直著驚
guá sim-lāi it-ti̍t tio̍h-kiann
誤會講袂清
gōo-huē kóng buē tshing
可憐的可憐的
khó-lîn ê khó-lîn ê
可憐阮
khó-lîn gún
為情為愛
uī tsîng uī ài
流出目屎無人知 啊~
lâu tshut ba̍k-sái bô-lâng tsai ah~