世間活菩薩

《世間活菩薩》Sè-kan Ua̍h-phôo-sat
七郎Tshit-lông
——————————————
有人用心咧做人
ū-lâng iōng-sim teh tsuè-lâng
付出犧牲無暝無工
hù-tshut hi-sing bô-mê bô-kang
愛的關懷照世間
ài ê kuan-huâi tsiàu sè-kan
親像菩薩救世下凡
tshin-tshiūnn phôo-sat kiù-sè hā-huân

這个社會已經變款
tsit ê siā-huē í-king piàn-khuán
悲傷的故事
pi-siong ê kòo-sū
哪會遮爾慘
ná ē tsiah-nī tshám
關心咱的身邊的人
kuan-sim lán ê sin-pinn ê lâng
挽救濟濟失落孤帆
bán-kiù tsuē-tsuē sit-lo̍h koo-phâng

請你毋通失志絕望
tshiánn lí m̄-thang sit-tsì tsua̍t-bāng
毋通行入歹路暗巷
m̄-thang kiânn-ji̍p pháinn-lōo àm-hāng
咱有心愛也有序大人
lán ū sim-ài iā ū sī-tuā-lâng
較苦嘛著喙齒咬予絚
khah khóo mā tio̍h tshuì-khí kā hōo ân

一關過一關
tsi̍t-kuan kuè tsi̍t-kuan
一站過一站
tsi̍t-tsām kuè tsi̍t-tsām
咱若勇敢來承擔
lán nā ióng-kám lâi sîng-tam
一定跳出苦海烏暗
it-tīng thiàu-tshut khóo-hái oo-àm

感謝幫助咱的人
kám-siā pang-tsōo lán ê lâng
感恩社會天的幫忙
kám-un siā-huē thinn ê pang-bâng
啊!你咱攏是有情世間活菩薩
ah! lí lán lóng-sī ū-tsîng sè-kan ua̍h-phôo-sat