我的阿母

《我的阿母》Guá ê A-bú
Mr.七
——————————————
你將阮生共阮晟
lí tsiong gún senn kā gún tshiânn
望阮成龍又成鳳
bāng gún sîng-liông iū sîng-hōng
一路牽教毋敢放
it-lōo khan-kà m̄-kánn pàng
望阮未來有成功
bāng gún bī-lâi ū sîng-kong

毋為家己只顧阮
m̄-uī ka-kī tsí kòo gún
將阮囥咧心內疼
tsiong gún khǹg teh sim-lāi thiànn
過去艱苦放水流
kuè-khì kan-khóo pàng tsuí lâu
只求囝兒平安大
tsí kiû kiánn-jî pîng-an tuā

佇佗位
tī tó-uī
食飽未
tsia̍h-pá–buē
病疼好矣未
pēnn-thiànn hó–ah buē
我是你的心頭石
guá sī lí ê sim-thâu tsio̍h
你的心肝
lí ê sim-kuann
你予阮寄付一生
lí hōo gún kià-hù it-sing
將阮來保護
tsiong gún lâi pó-hōo
永遠是阮的支持
íng-uán sī gún ê tsi-tshî
也是牽掛
iā-sī khian-kuà

看你盹龜咧愛睏
khuànn lí tuh-ku leh ài-khùn
心頭驚惶袂出聲
sim-thâu kiann-hiânn buē tshut-siann
恬恬聽你喘氣聲
tiām-tiām thiann lí tshuán-khuì siann
望你毋免受風寒
bāng lí m̄-bián siū hong-kuânn
越頭看見白頭鬃
ua̍t-thâu khuànn-kìnn pe̍h thâu-tsang
一直猶未講感謝
it-ti̍t iáu-buē kóng kám-siā
祈求二媽轉來巡
kî-kiû Jī-má tńg-lâi sûn
囝孫序細好來晟
kiánn-sun sī-sè hó lâi tshiânn