青春

《青春》Tshing-tshun
丁姵均 Ting Puē-kun
——————————————
日頭啊赤焱焱
ji̍t-thâu–ah tshiah-iānn-iānn
稻仔日日大
tiū-á ji̍t-ji̍t tuā
照著媽媽
tsiò tio̍h má-mah
做穡的背影
tsuè-sit ê puē-iánn
一粒米
tsi̍t-lia̍p bí
摻著一滴汗
tsham tio̍h tsi̍t-tih kuānn
辛苦一生
sin-khóo it-sing
攏為著囝
lóng uī-tio̍h kiánn

向望囝兒孫
ǹg-bāng kiánn-jî-sun
成家立業
sîng-ka-li̍p-gia̍p
啊~用盡一生
ah~ iōng tsīn it-sing
任勞認命
jīm-lô jīn-miā
為著生活
uī-tio̍h sing-ua̍h
毋驚受風寒
m̄-kiann siū hong-kuânn
毋驚艱苦
m̄-kiann kan-khóo
毋驚烏暗夜
m̄-kiann oo-àm iā

啊~青春畫出
ah~ tshing-tshun uē tshut
深深的皺痕
tshim-tshim ê jiâu-hûn
若欲有孝
nā beh iú-hàu
著愛趁這陣
tio̍h-ài thàn tsit-tsūn
歲月無情
suè-gua̍t bô-tsîng
染成阿母的白頭鬃
ní sîng a-bú ê pe̍h thâu-tsang
閤家平安
ha̍p-ka pîng-an
是伊最大的願望
sī i tsuè tuā ê guān-bāng