思念故鄉的媽媽

《思念故鄉的媽媽》Su-liām Kòo-hiong ê Má-mah
一帆It-huân
——————————————
看見著可愛的
khuànn-kìnn tio̍h khó-ài ê
故鄉彼爿去
kòo-hiong hit-pîng khì
黃昏的山崙邊
hông-hun ê suann-lūn pinn
日頭紅記記
ji̍t-thâu âng-kì-kì
引阮來思念媽媽
ín gún lâi su-liām má-mah
引阮來思念媽媽
ín gún lâi su-liām má-mah
毋知怎樣過日子
m̄-tsai tsuánn-iūnn kè ji̍t-tsí
毋過阮踮他鄉里
m̄-koh gún tiàm thann-hiunn-lí
毋過阮踮他鄉里
m̄-koh gún tiàm thann-hiunn-lí
拍拚過日子
phah-piànn kuè ji̍t-tsí
袂得佮你來相見
buē-tit kah lí lâi sio-kìnn

↓↓—(口白)—↓↓
媽媽
má-mah
黃昏若到
hông-hun nā kàu
我就真思念你
guá tiō tsin su-liām lí
↑↑—(口白)—↑↑

透早就出門去
thàu-tsá tiō tshut-mn̂g khì
做到黃昏時
tsuè kàu hông-hun sî
雖然是真拖磨
sui-jiân sī tsin thua-buâ
也是不得已
iā-sī put-tik-í
媽媽的生日若到
má-mah ê sinn-ji̍t nā kàu
媽媽的生日若到
má-mah ê sinn-ji̍t nā kàu
彼時我會回鄉里
hit-sî guá ē huê hiunn-lí
毋過阮踮他鄉里
m̄-koh gún tiàm thann-hiunn-lí
毋過阮踮他鄉里
m̄-koh gún tiàm thann-hiunn-lí
猶原思念你
iu-guân su-liām lí
媽媽請你免掛意
má-mah tshiánn lí bián khuà-ì

↓↓—(口白)—↓↓
媽媽你的生日若到
má-mah lí ê sinn-ji̍t nā kàu
我一定會轉去
guá it-tīng ē tńg–khì
請你免掛意乎
tshiánn lí bián khuà-ì–honnh
↑↑—(口白)—↑↑

看見著故鄉的
khuànn-kìnn tio̍h kòo-hiong ê
日落黃昏時
ji̍t-lo̍h hông-hun sî
引阮來想鄉里
ín gún lâi siūnn hiunn-lí
心內感傷悲
sim-lāi kám siong-pi
阮今夜猶原一个
gún kim-iā iu-guân tsi̍t-ê
阮今夜猶原一个
gún kim-iā iu-guân tsi̍t-ê
孤單稀微過長暝
koo-tuann hi-bî kè tn̂g-mî
只有是夢中相見
tsí-ū sī bāng-tiong sann-kìnn
只有是夢中相見
tsí-ū sī bāng-tiong sann-kìnn
親愛媽媽你
tshin-ài má-mah lí
不覺心酸珠淚滴
put-kak sim sng tsu-luī tih