南風吹來

《南風吹來》Lâm-hong Tshue–lâi
一帆It-huân
——————————————
南風又吹來
lâm-hong iū tshue–lâi
南風吹來心輕鬆
lâm-hong tshue–lâi sim khin-sang
春色可比自由夢
tshun-sik khó-pí tsū-iû bāng
看見著蝴蝶賞花欉
khuànn-kìnn tio̍h ôo-tia̍p siúnn hue-tsâng
思念心愛你一人
su-liām sim-ài lí tsi̍t-lâng
為你心茫茫
uī lí sim bâng-bâng
南風又吹來
lâm-hong iū tshue–lâi
思念你一人
su-liām lí tsi̍t-lâng

南風又吹來
lâm-hong iū tshue–lâi
行到懷念小溪邊
kiânn kàu huâi-liām sió-khue pinn
白花開透送芳味
pe̍h-hue khui-thàu sàng phang-bī
聽見著鳥隻吟歌詩
thiann-kìnn tio̍h tsiáu-tsiah gîm kua-si

引阮思念心愛伊
ín gún su-liām sim-ài i
為你心綿綿
uī lí sim mî-mî
南風又吹來
lâm-hong iū tshue–lâi
想著心愛伊
siūnn-tio̍h sim-ài i

南風又吹來
lâm-hong iū tshue–lâi
行到昔日樹林邊
kiânn kàu sik-ji̍t tshiū-nâ pinn
黃昏日頭紅記記
hông-hun ji̍t-thâu âng-kì-kì
想起著早日好情義
siūnn-khí tio̍h tsá-ji̍t hó tsîng-gī
一切情景酸甘甜
it-tshè tsîng-kíng sng-kam-tinn
為你心迷醉
uī lí sim bê-tsuì
南風又吹來
lâm-hong iū tshue–lâi
懷念心愛伊
huâi-liām sim-ài i