南蠻夜曲

《南蠻夜曲》Lâm-bân Iā-khik
丁黛Ting Tāi
——————————————
月娘光光
ge̍h-niû kng-kng
照在檳榔菁仔欉
tsiò tsāi pin-nn̂g tshinn-á-tsâng
男女相牽跳舞
lâm-lú sio-khan thiàu-bú
看著真輕鬆
khuànn tio̍h tsin khin-sang
湖水照著燈火粒粒紅
ôo-tsuí tsiò tio̍h ting-hué lia̍p-lia̍p âng
好話怎樣毋敢對我講
hó-uē tsuánn-iūnn m̄-kánn tuì guá kóng
我的愛人是啥人
guá ê ài-jîn sī siánn-lâng
每日思念心內人
muí-ji̍t su-liām sim-lāi-lâng
予阮想甲心茫茫
hōo gún siūnn kah sim bâng-bâng

南風吹著樹枝
lâm-hong tshue tio̍h tshiū-ki
搖去又搖來
iô khì iū iô lâi
彼爿山跤
hit pîng suann-kha
日頭漸漸咧斜西
ji̍t-thâu tsiām-tsiām teh tshiâ-sai
滿腹希望
muá-pak hi-bāng
伊哪袂了解
i ná buē liáu-kái
黃昏若到
hông-hun nā kàu
心悶無人知
sim-būn bô-lâng tsai
我的愛人未轉來
guá ê ài-jîn buē tńg–lâi
每日思念
muí-ji̍t su-liām
伊毋知
i m̄-tsai
予阮想了心悲哀
hōo gún siūnn liáu sim pi-ai

深夜靜靜
tshim-iā tsīng-tsīng
孤單倚在窗仔邊
koo-tuann uá tsāi thang-á-pinn
遠遠椰子樹頂
hn̄g-hn̄g iâ-tsí-tshiū tíng
月娘真正圓
ge̍h-niû tsin-tsiànn înn
自嘆孤戀
tsū-thàn koo-luân
目屎強欲滴
ba̍k-sái kiōng-beh tih
我是愛伊早日來相見
guá sī ài i tsá-ji̍t lâi sio-kìnn
我的愛人去佗位
guá ê ài-jîn khì tó-uī
每日思念親兄你
muí-ji̍t su-liām tshin-hiann lí
予阮想了心內悲
hōo gún siūnn liáu sim-lāi pi