青春悲喜曲

《青春悲喜曲》Tshing-tshun Pi-hí Khik
作詞：陳達儒 Tân Ta̍t-jû
2010年陳達儒先生紀念音樂會合唱
————————————-
公園路月暗暝
kong-hn̂g lōo gue̍h-àm mî
東爿只有幾粒星
tang-pîng tsí-ū kuí lia̍p tshinn
伴著阮目屎滴
phuānn tio̍h gún ba̍k-sái tih
毋敢出聲獨看天
m̄-kánn tshut-siann to̍k khuànn thinn
.
想彼時雙人
siūnn hit-sî siang-lâng
結合好情意
kiat-ha̍p hó tsîng-ì
想今日身軀
siūnn kim-ji̍t sin-khu
毋是普通時
m̄-sī phóo-thong-sî
.
(口白)—–↓
吳先生
Ngôo sian-sinn
阮已經無來離開病院的看護婦生活
gún í-king bô lâi lī-khui pēnn-īnn ê khàn-hōo-hū sing-ua̍h
是袂用得啦
sī buē-īng-ê–lah
阮是信賴你的話
gún sī sìn-lāi lí ê uē
信賴先生你的人格
sìn-lāi sian-sinn lí ê jîn-keh
但是這陣的我
tān-sī tsit-tsūn ê guá
已經毋是普通的身軀囉
í-king m̄-sī phóo-thong ê sin-khu–looh
(口白)—–↑
.
公園邊杜鵑啼
kong-hn̂g-pinn tōo-kuan thî
更深露水滴白衣
king tshim lōo-tsuí tih pe̍h-i
心憂悶無元氣
sim iu-būn bô guân-khì
煩惱身中的囝兒
huân-ló sin-tiong ê kiánn-jî
.
為難是毋敢
uî-lân sī m̄-kánn
對人亂講起
tuì lâng luān-kóng khí
阮運命現在
gún ūn-miā hiān-tsāi
親像在水墘
tshin-tshiūnn tsāi tsuí-kînn
.
(口白)—–↓
事到如今
sū kàu jû-kim
上煩惱的就是腹肚內的這个囡仔
siōng huân-ló–ê tsiū-sī pak-tóo-lāi ê tsit-ê gín-á
無偌久就欲來出世
bô-guā-kú tō beh lâi tshut-sì
你若無對爸母表白
lí nā-bô tuì pē-bú piáu-pi̍k
允准你咱的結婚
ún-tsún lí-lán ê kiat-hun
阮也無面通見社會的人
gún iā bô-bīn thang kìnn siā-huē ê lâng
全望先生你毋通袂記得
tsuân bāng sian-sinn m̄-thang buē-kì-tit
咱初戀的勇氣才好啊
lán tshoo-luân ê ióng-khì tsiah hó–ah
(口白)—–↑
.
公園內花芳味
kong-hn̂g-lāi hue-phang-bī
花芳可比阮舊年
hue-phang khó-pí gún kū-nî
叮嚀哥愛會記
ting-lîng ko ài ē kì
毋通愛花無愛枝
m̄-thang ài hue bô ài ki
.
阮心內為哥
gún sim-lāi uī ko
無變愛到死
bô piàn ài kàu sí
阮一生毋知
gún it-sing m̄-tsai
幸福抑是悲
hīng-hok ia̍h-sī pi

——

公園路雨毛毛
kong-hn̂g lōo hōo mn̂g-mn̂g
單身行出病院門
tuann-sin kiânn tshut pēnn-īnn mn̂g
幸福夢今無向
hīng-hok bāng tann bô-ǹg
愈想愈恨割心腸
jú siūnn jú hūn kuah sim-tn̂g
.
為著伊
uī-tio̍h i
有厝變成毋敢轉
ū tshù piàn-sîng m̄-kánn tńg
可恨伊
khó-hūn i
放阮母囝誰擔當
pàng gún bó-kiánn sia̋ng tam-tng
.
(口白)—–↓
薄情郎
po̍k-tsîng-lông
阮是信賴你是一个人格者
gún sī sìn-lài lí sī tsi̍t-ê jîn-keh-tsiá
是一个有責任的人
sī tsi̍t-ê ū-tsik-jīm ê lâng
誰知影你所講的話
sia̋ng tsai-iánn lí sóo kóng ê uē
全是花言巧語
tsuân sī hua-giân khá-gí
一時做你走避
it-sî tsuè lí tsáu-phiah
腹肚內的囡仔
pak-tóo-lāi ê gín-á
強強就欲出世囉
kiōng-kiōng tō beh tshut-sì–looh
已經無法度
í-king bô-huat-tōo
閣再瞞騙社會的耳目
koh-tsài muâ-phiàn siā-huē ê ní-bo̍k
母囝前途
bó-kiánn tsiân-tôo
叫阮怎樣才好
kiò gún tsuánn-iūnn tsiah hó
(口白)—–↑
.
公園路春天後
kong-hn̂g lōo tshun-thinn āu
兩爿蟲聲亂操操
lióng-pîng thâng-siann luān-tshau-tshau
薄情郎做伊走
po̍k-tsîng-lông tsuè i tsáu
這款愛人誰敢交
tsit khuán ài-jîn sia̋ng kánn kau
.
想幼囝
siūnn iù-kiánn
出世日子已經到
tshut-sì ji̍t-tsí í-king kàu
可恨伊
khó-hūn i
僥心絕情無回頭
hiau-sim tsua̍t-tsîng bô huê-thâu
.
(口白)—–↓
想起初戀彼暗
siūnn-khí tshoo-luân hit àm
相親相愛
siòng-tshin siong-ài
行著這條公園路
kiânn-tio̍h tsit tiâu kong-hn̂g lōo
何等快樂甜蜜
hô-tíng khuài-lo̍k tinn-bi̍t
愛情的結合
ài-tsîng ê kiat-ha̍p
期待幼囝來出世
kî-thāi iù-kiánn lâi tshut-sì
會得創造幸福的家庭
ē-tit tshòng-tsō hīng-hok ê ka-tîng
再三再四
tsài-sam tsài-sù
望你毋通袂記
bāng lí m̄-thang buē-kì
意外盡靠盡誤
ì-guā tsīn khò tsīn ngōo
變成一場空夢的青春悲喜曲
piàn-sîng tsi̍t tiûnn khang-bāng ê tshing-tshun pi-hí khik
吳先生
Ngôo sian-sinn
你真真害人不淺啊
lí tsin-tsin hāi-jîn put-tshián–ah
(口白)—–↑
.
公園路孤單行
kong-hn̂g lōo koo-tuann kiânn
手提包袱哭出聲
tshiú the̍h pau-ho̍k khàu tshut-siann
求幸福變歹命
kiû hīng-hok piàn pháinn-miā
咬牙切齒叫君名
kā-gê tshiat-khí kiò kun miâ
.
無想阮
bô siūnn gún
應該也著想親囝
ìng-kai iā tio̍h siūnn tshin-kiánn
可恨伊
khó-hūn i
害阮墜落烏暗城
hāi gún tuī-lo̍h oo-àm-siânn