臺語社~~臺語七字新樂園~~社友作品網站

5627.
Àm-sî kah lâng khì hong-so. Sì-kè tsáu-tsông ài tshit-thô.
暗時佮人去風騷，四界走傱愛tshit迌，
Khiā bē siánn tsāi oo-pe̍h tó. Siūnn-beh tsoh-sit thé-la̍t bô.
徛袂啥在烏白倒，想欲作穡體力無。
(2015/1/23)

5628.
Siong-kuan kui-tīng bô sing khuànn. Hőng mē bē-sóng thiànn sim-kuann.
相關規定無先看，Hőng罵袂爽疼心肝，
Ka-tī kî-si̍t mā lān-muā. Bîng-tsai àu-hì kè-sio̍k puann.
家己其實嘛lān蔓，明知漚戲繼續搬。
(2015/1/23)

5629.
Thè lâng tsáu-tsông ná siáu-thiú. Ka-tī bô-lí ài huah-hiu.
替人走傱若小丑，家己無理愛喝咻，
Tshī-tiúnn kóng-uē bô-beh tshiù. Tian-tò āng-siann jú tshàng-tshiu.
市長講話無欲tshiù，顛倒āng聲愈聳鬚。
(2015/1/23)

5630.
Tshī-tiúnn sàng sann goo-tshing thò. Khah-iânn tsóng-thóng ū ná bô.
市長送衫五千套，較贏總統有若無，
Gī-hīng ta̍t-tit lâng o-ló. La̍p-suè sio-thīn mā ē hô.
義行值得人呵咾，納稅相伨嘛會和。
(2015/1/23)

5631.
Khò-sè ka-tī sī bîn-tāi. Ho̍k-bū suán-bîn tián tuā-pâi.
靠勢家己是民代，服務選民展大牌，
Li̍k-iânn gī-uân sìng-tē bái. M̄-kiann kiàn-siàu tsìng-lâng tsai.
綠營議員性地bái，毋驚見笑眾人知。
(2015/1/23)

5632.
Uī-tio̍h beh tháu pak-lāi hué. Tsng kah khó-liân ba̍k-sái huê.
為著欲敨腹內火，裝甲可憐目屎huê，
Bô-siūnn kui-tīng sī siánn-huè. Tio̍h kuài ka-tī ba̍k-tsiu hue.
無想規定是啥貨，著怪家己目睭花。
(2015/1/23)

5633.
Kun-tiong sing-ua̍h tsē hiong-hiám. Tsò gû tsò bé iáu hőng hiâm.
軍中生活濟凶險，做牛做馬猶hőng嫌，
Mê-ji̍t put-sî lâng lâi hiàm. Tiúnn-kuann lāu-tsiáu kóng-uē hiam.
暝日不時人來喊，長官老鳥講話薟。
(2015/1/23)

5634.
Pún-lâi tī tshù pē-bú ài. Lâi-kàu pōo-tuī tsò lôo-tsâi.
本來佇厝爸母愛，來到部隊做奴才，
Tú-tio̍h lāu-tsiáu lâi sio hāi. Iânn-khu guā-kháu ná-ē tsai.
拄著老鳥來相害，營區外口哪會知。
(2015/1/23)

5635.
Ta̍k-pái lóng-sī tsi̍t nn̄g ē. Siūnn-beh tsí ngiau bē koh ke.
逐擺攏是一兩下，想欲止擽袂閣加，
Tshan-tshiūnn tsiú-kuá a̍h tio̍h kè. Kam-guān khuànn-phuà tshuē pa̍t-ê.
親像守寡曷著嫁，甘願看破揣別个。
(2015/1/23)

5637.
Huân-ló tshī-tiúnn ài tshâ-siàu. Kuài ū tîng-tânn sak tsiân-tiâu.
煩惱市長愛查數，怪有重耽捒前朝，
Ke-pô muî-thé tsò bîn-tiāu. Nā tsai kiat-kó bīn-á jiâu.
家婆媒體做民調，若知結果面仔皺。
(2015/1/24)

5638.
Tsi̍t-tsiah phang-á tìng bíng-hóo. Tíng-tsin kut-la̍t bô hôo-tôo.
一隻蜂仔叮猛虎，頂真骨力無糊塗，
Tâi-pak tshī-hú ū i kòo. Bián-kiann tsâi-thuân sim-kuann oo.
台北市府有伊顧，免驚財團心肝烏。
(2015/1/24)

5639.
Sik-ji̍t luân-tsîng m̄-kam tàn. Suah tī tsit-tsūn bóng khàu-tshan.
昔日戀情毋甘擲，煞佇這陣罔哭呻，
Kui-ê khuànn-phuà tsiah-sī tsán. Beh tshuē koh ū bô khùn-lân.
規个看破才是讚，欲揣閣有無困難。
(2015/1/24)

5640.
Tong-tshoo khǹg tī thuah-á tún. A̍h tsai kim-ji̍t sim pit-sûn.
當初囥佇屜仔囤，曷知今日心必巡，
Lī-ha̍p lóng tio̍h khò iân-hūn. Tshuàn siūnn kuè-khì gōng ū-tshun.
離合攏著靠緣份，串想過去戇有賰。
(2015/1/24)

5641.
Tshian-sin-bān-khóo tshī liáu-jiân. Tsò lâng pē-bú siōng khó-liân.
千辛萬苦飼了然，做人爸母上可憐，
Lú-jî huí-luī khuànn-hiān-hiān. Sim-kuann tsiâu tsheh tshuì bû-giân.
女兒匪類看現現，心肝齊慼喙無言。
(2015/1/24)

5642.
Niû-á senn-suí thâu lê-lê. Tsu-thài iau-kiau bīn-bah pe̍h.
娘仔生媠頭犁犁，姿態妖嬌面肉白，
Tshi-tsîng a-ko lâi kàu-tè. Hōo i siânn kah lin-long-se̍h.
癡情阿哥來到地，予伊唌甲玲瓏踅。
(2015/1/24)

5643.
Tuā-miâ kiò-tsò thô-tsiap-lí. Tsit-tsūn tsiànn-sī khui-hue sî.
大名叫做桃接李，這陣正是開花時，
Tsi̍t-nn̄g-luí-á sing pò-hí. Liam-mi pe̍h-hue muá tshiū-ki.
一兩蕊仔先報喜，連鞭白花滿樹枝。
(2015/1/24)

5644.
Nn̄g tsiah niau-mi tsìnn koh iù. M̄-tsai siánn-mih kiò iu-tshiû.
兩隻貓咪茈閣幼，毋知啥物叫憂愁，
Khùn kah thán-tshiò tshun kha-tshiú. Bāng-tiong tsiàu-siông îng-liu-liu.
睏甲坦笑伸跤手，夢中照常閒溜溜。
(2015/1/24)

5645.
Sin-khu tn̂g-tn̂g kha té-té. Ū si̍t bē pue hái–lí pê.
身軀長長跤短短，有翼袂飛海裡扒，
Khuànn tio̍h soh-á pa̍k kē-kē. Khah tshám kuân-suann lâi huâinn-ke̍h.
看著索仔縛低低，較慘懸山來橫扴。
(2015/1/24)