臺語社~~臺語七字新樂園~~社友作品網站

5531.
Sin ta̍h hiám-lōo lâng kiann-hiânn. Put-sî pua̍h-miā piànn su-iânn.
身踏險路人驚惶，不時跋命拚輸贏，
Tshia-iānn bē kú suî bô-miā. Tng-thâu-pe̍h-ji̍t hiáng tshìng-siann.
奢颺袂久隨無命，當頭白日響銃聲。
(2015/1/15)

5569.
Niû-á senn-suí ū hó-khuànn. Siánn-lâng kiat-iân khò hun-puânn.
娘仔生媠有好看，啥人結緣靠薰盤，
Siōng-bué tsi̍t-ê lâi puê-phuānn. Tshun–ê uí-khut khah koo-tuann.
上尾一个來陪伴，賰的委屈較孤單。
(2015/1/18)

5570.
Ngôo–sènn ka-tī khí tsi̍t tshiúnn. Sió-se-mn̂g guā ū tsûn-tiûnn.
吳姓家己起一廠，小西門外有船場，
Sì biō ha̍p-tsok kiann lâng tshiúnn. Tshau-liān bîn-ióng kòo siânn-tshiûnn.
四廟合作驚人搶，操練民勇顧城牆。
(2015/1/18)

5571.
Âng-ting bô-thang tsiò tuā-mn̂g. Tshoo-tshân kuài-tshiú thiah hue-hn̂g.
紅燈無通照大門，粗殘怪手拆花園，
Pah-nî hong-so kàu tsia tn̄g. Khuànn i tshù tó sim-thâu sng.
百年風騷到遮斷，看伊厝倒心頭酸。
(2015/1/18)

5572.
Beh tāng kang-tîng ū-suàn tsē. Ū-suàn puah–lo̍h ta̍k-ke the̍h.
欲動工程預算濟，預算撥落逐家提，
The̍h–tio̍h sio-tsenn khǹg khòo-té. Bô khǹg khòo-té tō a-se.
提著相爭囥褲袋，無囥褲袋就阿西。
(2015/1/18)

5573.
Bîn-sing-li̍k-hn̂g ū tsio̍h-siōng. Sik-ji̍t khì-hun bô pîng-siông.
民生綠園有石像，昔日氣氛無平常，
Sian-lia̍t ing-tsu bô-tè siòng. Jû-kim siūnn–lâi lâng kám-siong.
先烈英姿無地相，如今想來人感傷。
(2015/1/18)

5574.
Tsuân-tâi-siú-ha̍k ū tshia-iānn. Biō lāi thuân-sàng tha̍k-tsheh siann.
全台首學有奢颺，廟內傳送讀冊聲，
Lāu-tshiū kuāinn lâng tò-siàng-hiànn. Jû-kim iû-kheh that biō-tiânn.
老樹拐人倒摔向，如今遊客窒廟埕。
(2015/1/18)

5575.
Sua-tsiu thūn-thôo tsò phàu-siânn. Lāi-té tshāi phàu hōo-lâng kiann.
沙洲坉塗做炮城，內底tshāi炮予人驚，
Tòng-tsò kóo-tsik sioh-miā-miā. Tong-nî phàu-siann tsuánn thàm-thiann.
當做古蹟惜命命，當年炮聲怎探聽。
(2015/1/18)

5576.
Sa-khá-lí-bah hó-tsia̍h mi̍h. Siânn lâng that kah e̍h-tsinn-tsinn.
Sa-khá-lí-bah好食物，唌人窒甲狹櫼櫼，
Íng-sî sīng-huē bô-tàng kìnn. Tang-sî huê-hûn tsīn khò thinn.
往時盛會無當見，當時回魂盡靠天。
(2015/1/18)

5551.
Sann-kenn-puànn-mê tio̍h thâu-tsióng. Tsi̍t-sî tsing-sîn tài tshiò-iông.
三更半暝著頭獎，一時精神帶笑容，
Beh tshuē tshái-kǹg bô-tè siòng. Tsiah-tsai sī bāng lâng kám-siong.
欲揣彩券無地相，才知是夢人感傷。
(2015/1/17)

5552.
Bāng-lōo tíng-kuân ke-kiám thau. Tòng-tsò ka-tī siōng-kài gâu.
網路頂懸加減偷，當做家己上蓋gâu，
Tshit sù jī pat oo-pe̍h tàu. M̄-kiann tsìng-lâng lâi lia̍h-pau.
七四二八烏白鬥，毋驚眾人來掠包。
(2015/1/17)

5553.
Lâng bé tshái-kǹg guá bô tuè. Suah tī bāng-tiong tio̍h tsi̍t-huê.
人買彩券我無綴，煞佇夢中著一回，
Tsing-sîn liáu-āu siunn kāu-uē. Sim-kuann tih-hueh suí-bóo khue.
精神了後傷厚話，心肝滴血媠某詼。
(2015/1/17)

5554.
Beh tiòng thâu-tsióng bô hē-pún. Bē-hiáu pê-tsiūnn gōng ū tshun.
欲中頭獎無下本，袂曉扒癢戇有賰，
Tsá tsai kam-guān kè-siok khùn. Khah iânn bāng tshénn sit sîn-hûn.
早知甘願繼續睏，較贏夢醒失神魂。
(2015/1/17)

5555.
Ta̍k-ke puànn-mê kiann tē-tāng. Guá sī khùn kah m̄-tsai lâng.
逐家半暝驚地動，我是睏甲毋知人，
Uī tio̍h huat-tsâi tsò bîn-bāng. Khióng-kiann khùn-tshénn bān-sū khang.
為著發財做眠夢，恐驚睏醒萬事空。
(2015/1/17)

5556.
Khiû-moo giàng-gê kiò kiàm-sai. Bīn buah pe̍h-hún lâng m̄ tsai.
虯毛齴牙叫劍獅，面抹白粉人毋知，
Bô khuànn pó-kiàm kâm tshuì-lāi. Pìnn-kuí-pìnn-kuài eh-ūn lâi.
無看寶劍含喙內，變鬼變怪厄運來。
(2015/1/17)

5557.
Kha ta̍h thih-bé kang-hu hó. Tuā-ke-sió-hāng sì-kè gô.
跤踏鐵馬工夫好，大街小巷四界遨，
Ka-tī âng-ting tsiàm tshia-tō. Tài-sue pa̍t-lâng sǹg bē-hô.
家己紅燈占車道，帶衰別人算袂和。
(2015/1/17)

5558.
Ta̍k-ki tshoo-ióng tsiânn gâu khiàu. Sū-lîm iā-tshī ū tuā tiau.
逐枝粗勇誠gâu翹，士林夜市有大鵰，
M̄-kuán tshàng siánn uánn-ko liāu. Kâm tī tshuì-lāi thang tsí hiâu.
毋管藏啥碗糕料，含佇喙內通止嬈。
(2015/1/17)

5559.
Sin-kiàn pháu-tō tshiūnn tāu-hū. Khi-khi-kho̍k-kho̍k ài tîng hu.
新建跑道像豆腐，敧敧硞硞ài重撫，
Î-hōo tsìn-tōo nā bē-hù. Hui-ki pua̍h-tó án-tsuánn hû.
維護進度若袂赴，飛機跋倒按怎扶。
(2015/1/17)

5560.
Uan-uan-khiau-khiau Lôo-si káng. Lông-huē ōo-tsiú sûn koh phang.
彎彎曲曲螺絲港，農會芋酒醇閣芳，
Hái-kînn kong-hn̂g ku-khak tāng. Pe̍h-sìnn ia̍t-tshiú tsio-hoo lâng.
海墘公園龜殼重，白扇揲手招呼人。
(2015/1/17)

5561.
Phuè-ga̍k khióng-pòo sim tîm-tāng. Kio̍k-tsîng kín-tiunn kiann-sí-lâng.
配樂恐怖心沉重，劇情緊張驚死人，
Tsè-tsō khì-hun khò tsit hāng. Môo-im thuân náu bián huì-kang.
製造氣氛靠這項，魔音傳腦免費工。
(2015/1/17)

5562.
Koo-niû tsiú-tsuì khiā bē tsiànn. Ūn-hô-thâu pinn khàu ai-siann.
姑娘酒醉徛袂正，運河頭邊哭哀聲，
Nāi-hô tsîng-lông bô-khuànn-iánn. Kiò-lâng tsuánn ū hó sim-tsiânn.
奈何情郎無看影，叫人怎有好心情。
(2015/1/17)(2015/1/18改寫)

5563.
Siong-sìn hì-giân thàn po̍k-bīng. Hōo kun khi-phiàn tsin kám-tsîng.
相信戲言嘆薄命，予君欺騙真感情，
Bô-nāi lâng-sim pí ping líng. Iōng tsiú bé tsuì sim jú gîng.
無奈人心比冰冷，用酒買醉心愈凝。
(2015/1/17)

5564.
Ku-lîng-sìng-bó bô pó-pì. Sûn-tsîng koo-niû hōo lâng khi.
龜靈聖母無保庇，純情姑娘予人欺，
Ài m̄-tio̍h lâng khah tshám sí. Sit-hûn lo̍k-phik bô-liáu-sî.
愛毋著人較慘死，失魂落魄無了時。
(2015/1/17)

5565.
Sik-ji̍t lú-tsú tī tsia kiânn. Āu-puè thūn-thôo lâi khí-siânn.
昔日女子佇遮行，後輩坉塗來起城，
Àn-sǹg Tiong-kok khah tshia-iānn. Tsìn-tsîng ai-kua bô-tàng thiann.
按算中國較奢颺，進前哀歌無當聽。
(2015/1/17)

5566.
Khong-lo̍k-ke pinn ū hue-king. A-sià ū-tsînn lâi Sin-ting.
康樂街邊有花間，阿舍有錢來新町，
Tshuì kóng ài niû beh kā sīng. Siánn-lâng tíng-tsin sim-kuann gîng.
喙講愛娘欲共倖，啥人頂真心肝凝。
(2015/1/17)

5567.
Tsi̍t-tiâu ai-kua ta̍k-ke tshiùnn. Kok-lâng hiong-im bô-kāng khiunn.
一條哀歌逐家唱，各人鄉音無仝腔，
Lú-tsú kiat-kio̍k m̄-kánn siūnn. Sim-lāi uì-kuânn hong lâi tshiûnn.
女子結局毋敢想，心內畏寒風來颺。
(2015/1/17)

5578.
Khó-tshì kiat-sok tán pàng-ká. Sîng-tsik bô-hó sim-tsîng tsha.
考試結束等放假，成績無好心情差，
Khai-ha̍k liáu-āu tio̍h tîng kà. Ke liáu khuì-la̍t ke tshuì-ta.
開學了後著重教，加了氣力加喙焦。
(2015/1/19)

5579.
Pîng-sî hòng-tōng khak-si̍t hāi. Beh kiû tap-àn khò bîng-pâi.
平時放蕩確實害，欲求答案靠明牌，
Nā thang muá-hun tsìng-lâng ài. Su-iàu phah-piànn bô-lâng tsai.
若通滿分眾人愛，需要拍拚無人知。
(2015/1/19)

5580.
Pàng-ká tsìn-tsîng tuā piànn-sàu. Ha̍k-sing sūn-suà tshing tsheh-pau.
放假進前大摒掃，學生順紲清冊包，
Pùn-sò tàn liáu iáu bô-kàu. Khò-pún káng-gī lóng bô lâu.
糞埽擲了猶無夠，課本講義攏無留。
(2015/1/19)

5581.
Ioh tio̍h tap-àn bô-siánn hāu. Tsin-tsiànn ē-hiáu tsiah-sī gâu.
臆著答案無啥效，真正會曉才是gâu，
Kiò i tha̍k-tsheh kóng ngē-táu. Tshuàn khò pua̍h-pue siōng kha-sau.
叫伊讀冊講硬篤，串靠跋桮上跤梢。
(2015/1/19)

5582.
Hué-tshia-thâu pinn Phok-ài-lōo. Póo-si̍p póo kah bīn tsiâu oo.
火車頭邊博愛路，補習補甲面齊烏，
Khah-su phānn tshit lâi sàn-pōo. Nn̄g lâng khan-tshiú tsuân-sin soo.
較輸奅姼來散步，兩人牽手全身酥。
(2015/1/19)

5583.
Phok-ài-lōo pinn bé khah-tuà. Tiàm-á tshuàn pàng liû-hîng kua.
博愛路邊買卡帶，店仔串放流行歌，
Hit-tsūn siáu-liân m̄-tsiânn tuā. A̍h tsai siā-huē gâu tsiat-buâ.
彼陣少年毋成大，曷知社會gâu折磨。
(2015/1/19)

5584.
Bô-îng tsi̍t-poo khang-khuè pàng. Thiám kah soo-io m̄-tsai lâng.
無閒一晡工課放，忝甲酥腰毋知人，
Pak-lāi khang-khang siūnn tsia̍h tsàng. Tshuàn siūnn kòo-hiong tsàng-ha̍h phang.
腹內空空想食粽，串想故鄉粽箬芳。
(2015/1/19)

5585.
Tong-tshoo siáu-liân iáu tsió huè. Si̍t-kóo ū tīng piànn-miā pue.
當初少年猶少歲，翼股有tīng拚命飛，
Jû-kim tsia̍h-lāu suah huán-hué. Lī-hiong koo-tuann bô-lâng puê.
如今食老煞反悔，離鄉孤單無人陪。
(2015/1/19)

5586.
Kan-tann bē muâi lâng kóng gōng. Tsin-tsâi-si̍t-liāu bô phòng-hong.
干焦賣糜人講戇，真材實料無膨風，
Thàu-tsá tsia̍h tse sim-tsîng sóng. Nā-sī tsia̍h bô khí lia̍h-kông.
透早食這心情爽，若是食無起掠狂。
(2015/1/19)

5587.
Thàu-tsá pâi tànn kàu tiong-tàu. To̍k-ke kang-hu khòng thng-thâu.
透早排擔到中晝，獨家工夫炕湯頭，
Beh tsia̍h tio̍h ài kut-la̍t tsáu. Siánn-lâng tsia̍h ū siánn-lâng gâu.
欲食著ài骨力走，啥人食有啥人gâu。
(2015/1/19)

5588.
Kok-lâng thng-thâu tsiânn-tsē tsióng. Nā beh kam-tinn ū bûn-tsiong.
各人湯頭誠濟種，若欲甘甜有文章，
Tsāi-tē o-ló siōng him-sióng. Khì-bī ti̍k-sû bô pîng-siông.
在地呵咾上欣賞，氣味特殊無平常。
(2015/1/19)

5589.
Tshit-lāu-peh-lāu ké siáu-liân. Bô-i-bô-uá siōng khó-liân.
七老八老假少年，無依無倚上可憐，
Siūnn beh tsín-tsok kiann lak-lián. Hô-tsîng tsòng-tsì tsá tō lian.
想欲振作驚落臉，豪情壯志早就蔫。
(2015/1/19)

5590.
Tsia̍h-tsàng tsia̍h kàu înn-khuân tíng. Khuànn i tsàng-ha̍h pau nn̄g-tîng.
食粽食到圓環頂，看伊粽箬包兩重，
Sui-jiân bah-tsàng ū lâng hìng. Tsóng-sī tshài-tsàng khah bûn-bîng.
雖然肉粽有人興，總是菜粽較聞名。
(2015/1/19)

5591.
Lâng iáu-buē lāu sim sing lāu. Beh tsò tāi-sū siōng kha-sau.
人猶未老心先老，欲做大事上跤梢，
Phiàn kuá ha̍k-sing iáu ū-hāu. Tong-tshoo tsòng-tsì tsá tō phau.
騙寡學生猶有效，當初壯志早就拋。
(2015/1/19)

5592.
Khong-tīng-lōo pinn khuànn khiā-piah. Tshui-iû sio kà tâng-kóng tshia.
康定路邊看徛壁，催油相較銅管車，
Kui-kang siàu-siūnn phānn sió-tsiá. Tòng-tsò ka-tī sī siàu-iâ.
規工數想奅小姐，當做家己是少爺。
(2015/1/19)

5593.
Ná khiâ thih-bé kuānn ná lâu. Tsi̍t-lōo hn̄g-hn̄g kàu niû tau.
那騎鐵馬汗那流，一路遠遠到娘兜，
Kiann niû khuànn–tio̍h liam-mi tsáu. Ji̍t-thâu tshiò guán sī giàn-thâu.
驚娘看著連鞭走，日頭笑阮是癮頭。
(2015/1/19)

5594.
Tshiah-khàm Tshiah-khàm sio-tsenn tàu. Kui-khì kiò i âng-moo-lâu.
赤崁赤嵌相爭鬥，規氣叫伊紅毛樓，
Sui-jiân tsit-tsūn miâ-siann thàu. Âng-moo tshù-kuà lóng bô lâu.
雖然這陣名聲透，紅毛厝蓋攏無留。
(2015/1/19)

5595.
An-pîng siā-lāi ū kóo-pó. Tsiânn-tsē iû-kheh lâi tshit-thô.
安平社內有古堡，誠濟遊客來tshit迌，
Kî-si̍t kóo-pó tsá tō tó. Tsi̍t-tóo siânn-tshiûnn siōng hong-so.
其實古堡早就倒，一堵城牆上風騷。
(2015/1/19)

5596.
Tsū-jīn huah tsuí ē kian-tàng. Khan-ting kóng-kò heh-kiann lâng.
自認喝水會堅凍，刊登廣告嚇驚人，
Tsâi-thuân ū tsînn oo-pe̍h lāng. Î-hōo lī-ik tsiânn kāu-kang.
財團有錢烏白弄，維護利益誠厚工。
(2015/1/19)

5597.
Thiànn kiánn sioh bóo sī thih-hàn. Uân-sîng tsòng-tsì bô kán-tan.
疼囝惜某是鐵漢，完成壯志無簡單，
Jû-tshú tsa-poo khak-si̍t tsán. Ta̍t-tit it-sing kā tshiú khan.
如此查埔確實讚，值得一生共手牽。
(2015/1/19)

5599.
Khuànn lí senn-thuànn i bē-giàn. Ngē kā bó-gí kóng hong-giân.
看你生湠伊袂癮，硬共母語講方言，
Nā m̄ hōo lâng hiâm tshàu-tsiān. Tsi-tshî to̍k-li̍p kai tong-jiân.
若毋予人嫌臭賤，支持獨立該當然。
(2015/1/20)

5600.
Uī-tio̍h tsiànn-miâ lâi kiat-uàn. Put-jû tâng-tsê tàu suan-thuân.
為著正名來結怨，不如同齊鬥宣傳，
Sui-jiân bîng-tshing bô kāng-khuán. Kám tō ta̍t-tit lán tshau-huân.
雖然名稱無仝款，敢就值得咱操煩。

Hō-miâ nā-sī tsiàu tō-lí. Bián kiann Tiong-kok kā lán khi.
號名若是照道理，免驚中國共咱欺，
Ka-tī tio̍h sing ū tsì-khì. Ī-kok kāng-gí bô hi-kî.
家己著先有志氣，異國仝語無稀奇。

Guá iōng Tâi-gí tsò miâ-tshing. Lí kiò Bân-lâm mā huan-gîng.
我用台語做名稱，你叫閩南嘛歡迎，
Nā beh sio-tak pháinn-tshìng-tshìng. Jú bú jú luān sim bē tshing.
若欲相觸歹衝衝，愈舞愈亂心袂清。

Kám-tshiok bô-beh kè-sio̍k tshàng. Uē kóng tshut-tshuì tit-tsuē lâng.
感觸無欲繼續藏，話講出喙得罪人，
M̄-ài tsenn kah jû-tsháng-tsháng. Guān uī kiàn-kok tàu pang-bâng.
毋愛爭甲挐氅氅，願為建國鬥幫忙。
(2015/1/20)

5601.
Siūnn beh phānn tshit bô-lâng kà. Siunn-kuè kē-lōo ki-su̍t tsha.
想欲奅姼無人教，傷過低路技術差，
Tsi̍t-luí tsîng-hue khui-liáu tsá. Tshun-hong buē lâi tō sing ta.
一蕊情花開了早，春風未來就先焦。
(2015/1/20)

5602.
Niû-á senn-suí tsiânn khó-ài. Jû-kim tī tó siánn-lâng tsai.
娘仔生媠誠可愛，如今佇佗啥人知，
Kah niû lī-pia̍t huah bô-tshái. Tian-tò kuài-tsuē thinn an-pâi.
佮娘離別喝無彩，顛倒怪罪天安排。
(2015/1/20)

5603.
Sim-kuann siunn e̍h siōng bô-liōng. Tsu-pún ū kāu ài pí hiông.
心肝傷狹上無量，資本有厚愛比雄，
Suh lâng hueh-kuānn i huah thiòng. Tó ū tsînn thàn tāi-sing tshiong.
欶人血汗伊喝暢，佗有錢趁代先衝。
(2015/1/20)

5604.
Pîng-sî huán-ìng kha-tshiú tūn. Tsiàn-ki khí-pue sing bān-hun.
平時反應跤手鈍，戰機起飛先慢分，
Khuànn lâng kā lán oo-pe̍h thún. Ka-tī tang-sî thang tshut-sûn.
看人共咱烏白thún，家己當時通出巡。
(2015/1/20)

5605.
Ka-tī kā lâng ah-lo̍h-té. Bān-sū lóng ài thiann i ê.
家己共人壓落底，萬事攏愛聽伊的，
Tsu-thài giâ-kuân uē sáng-sè. Siunn-kuè tsú-kuan sī būn-tê.
姿態夯懸話聳勢，傷過主觀是問題。
(2015/1/20)

5606.
Thiann-kóng sian-thô sī hó-mi̍h. M̄-tsai sī sng a̍h-sī tinn.
聽講仙桃是好物，毋知是酸抑是甜，
Án-tsuánn jîn-kan ū-thang kìnn. Tsia̍h tsē kám-ē pue tsiūnn-thinn.
按怎人間有通見，食濟敢會飛上天。
(2015/1/20)

5608.
Beh khuànn tio̍h ài tshiō tāi-sing. Iân-tshiân sî-kan hòng kong-bîng.
欲看著ài炤代先，延延時間放光明，
Un-tōo bē sio lâng kóng líng. Khip-siu juā tsē lóng tsiâu hîng.
溫度袂燒人講冷，吸收偌濟攏齊還。
(2015/1/21)

5609.
Khò-sè ka-tī tsînn siōng tsē. Lia̍h-tsún ta̍k-ke thiann i ê.
靠勢家己錢上濟，掠準逐家聽伊的，
Hān-sî nn̄g-kang kóng siông-sè. Tsit-tsūn kàu-kî kám tio̍h ke.
限時兩工講詳細，這陣到期敢著加。
(2015/1/21)

5610.
Ka-tī tì-sik ū khueh-khiàm. Tshia-siunn kóng-pòo tiānn thiàu-tsiam.
家己智識有缺欠，車廂廣播定跳針，
Ta̍k tsióng gí-giân lóng ài liām. Tsiah bē ngāi hīnn tsìng-lâng hiâm.
逐種語言攏ài唸，才袂礙耳眾人嫌。
(2015/1/21)

5611.
Tsi̍t pha iām-hué siunn bô-tsîng. Kiù-hué ing-hiông lâi hi-sing.
一葩炎火傷無情，救火英雄來犧牲，
Jîn-hō ì-guā án-tsuánn tīng. Tsik-jīm kui-sio̍k tio̍h kóng-bîng.
人禍意外按怎定，責任歸屬著講明。
(2015/1/21)

5612.
Li̍k-sú kiàn-tio̍k khiā ē tsāi. Íng-kiú liû-thuân hōo-lâng tsai.
歷史建築徛會在，永久流傳予人知，
Pó-tshî kóo-tsik sī hó-tāi. Hi-bāng tuā-hué m̄-thang lâi.
保持古蹟是好代，希望大火毋通來。
(2015/1/21)

5613.
Nā beh tshia-iānn iōng kng tshiō. Lâng nā m̄ tshiō bē tshio-tiô.
若欲奢颺用光炤，人若毋炤袂tshio趒，
Tsia̍h lâng khah tsē hîng khah tsió. Iap kuá sai-khia ka-tī thio.
食人較濟還較少，揜寡私奇家己偷。
(2015/1/21)

5614.
Tsí-iàu pún-tsit khuànn hōo tshing. Bián-kiann piàn kah bô-kāng hîng.
只要本質看予清，免驚變甲無仝形，
Kuán i án-tsuánn tshia-pua̍h-píng. Tsóng-liōng put-piàn kàu íng-hîng.
管伊按怎捙跋反，總量不變到永恆。
(2015/1/21)

5616.
Bîn-kan su-siá siunn hūn-luān. Thui-tsiàn iōng-jī tio̍h suan-thuân.
民間書寫傷混亂，推薦用字著宣傳，
Ta̍k-lâng nā-tsai siá kāng-khuán. Tsín-hing Tâi-gí bô lân-kuan.
逐人若知寫仝款，振興台語無難關。
(2015/1/22)

5617.
Tsia̍p hian jī-tián hó si̍p-kuàn. Jī ū i-kì bē tsú-kuan.
捷掀字典好習慣，字有依據袂主觀，
Nā thang tsham-siông kāng tsi̍t khuán. Pí-tshú kau-thong bô mâ-huân.
若通參詳仝一款，彼此溝通無麻煩。
(2015/1/22)

5618.
Niû-á senn-suí iáu tsió-huè. Sin-tsâi iau-kiau tshīng-tshah hue.
娘仔生媠猶少歲，身材妖嬌穿插花，
Siūnn-beh mn̄g i kè–ah buē? Làu bô Ing-gí suah hőng khue.
想欲問伊嫁矣未，落無英語煞hőng詼。
(2015/1/22)

5619.
Hîng-uî bóng-tóng ná tsing-senn. Uàn-thàn tshin kiánn ka-tī senn.
行為懵懂若精牲，怨嘆親囝家己生，
Puê i siā-tsuē kiû huán-sénn. Tsìn-tsîng a̍h tio̍h án-ne-senn.
陪伊謝罪求反省，進前曷著按呢生。
(2015/1/22)

5620.
Peh-sènn tshut-tsînn i siōng ài. Nā-beh sù-sī tio̍h kam khai.
百姓出錢伊上愛，若欲四序著甘開，
King-tsè tshng e̍h thāi-gū bái. Tshut-sûn ing-kai tsē phoo-pâi.
經濟艙狹待遇bái，出巡應該濟舖排。
(2015/1/22)

5621.
Bāng-lōo tíng-kuân oo-pe̍h tah. A̍h tsai ji̍t-kî ū tsing-tsha.
網路頂懸烏白貼，曷知日期有精差，
Ka-tsài bāng-iú lâi tshe-kah. Tsit-būn kong-bûn tó-uī sa.
佳哉網友來差教，質問公文佗位捎。
(2015/1/22)

5622.
Ki-tsàn sènn-miā bô tiōng-sī. Beh-tsò sit-thâu khiàm ke-si.
基層性命無重視，欲做穡頭欠家私，
Kiù-lâng tian-tò ka-tī sí. Ǹg-bāng huán-síng tán hô-sî.
救人顛倒家己死，向望反省等何時。
(2015/1/22)

5623.
Lîng-tî iû-bîn tsing-senn sìng. Ok-tsit siáu-liân khiàm lâng tsing.
凌遲遊民精牲性，惡質少年欠人舂，
Tong-tshoo tshàng-tshiu pháinn-tshìng-tshìng. Tsit-tsūn án-tsuánn m̄-bián hîng.
當初聳鬚歹衝衝，這陣按怎毋免還。
(2015/1/22)

5624.
Ú-tiū bān-siōng tsin kî-biāu. Kám-ū pān-huat tsuân bat tsiâu.
宇宙萬象真奇妙，敢有辦法全捌齊，
M̄-thang jīn-uî jîn-luī khiáu. Beh kái bê-tê tio̍h tsiânn liâu.
毋通認為人類巧，欲解謎題著誠蹽。
(2015/1/22)

5625.
Ka-tī tsai-iánn siunn lak-lián. Ngē tshuē lí-iû tshìn-tshái pian.
家己知影傷落臉，硬揣理由凊彩編，
Beh kóng pe̍h-tsha̍t ū láu-liān. Bô sîng li̍p-uí tshiūnn pián-sian.
欲講白賊有老練，無成立委像諞仙。
(2015/1/22)