最近關心本土語言發展的人攏知影，佇「十二年國教課程綱要總綱（草案）」公聽會的會議中，多數發言的人攏要求本土語言佇國中必須愛改做必修。
以草案內底「本國語文」的規劃來看，佇國民中小學階段有分做兩部分，就是「國語文」佮「本土語文／新住民語文」，前者逐禮拜占五至六節課，後者干焦會當搶分一節，而且這節課到國中的階段就無去–矣。
目前本土語言課程佇國中的階段是「選修」，咱會當想看覓，若是無強制排入課程內底的科目，多數的學生、家長、教師佮學校敢會重視？閣較免講這是升學考試袂考的課程，有偌濟學校會予學生有選修的機會？
我 對這个問題真好奇，我本身佇桃園縣教冊，最近有去查桃園縣國中的本土語言開課資料。除了逐間學校攏會開課的原住民各族語的課程（因為這和升學加分有關係） 以外，桃園縣60間國中大約有2500班，今年2月到6月台語有9校開9班，客語是11校開25班（資料來源：桃園縣教育局小教科）。算起來有開台語佮客 語課程的學校是15％和18％，數字看起來敢若閣袂少，毋過咱若是以班級數來算，有機會選修台、客語的學生比例干焦有0.36％佮1％，這敢有合理？
政 府應該重視本土語言的教育，予伊對這馬干焦佇國小的課程延伸到國中，因為台灣人有權利要求用家己的母語來受教育。而且本土語言佇國中必修完全符合濟濟的聯 合國公約的精神，世界真濟國家對家己的母語抑是國內少數族群的語言，攏有誠好的支持體系，為啥物佇台灣煞連國中一禮拜一節課的要求都做袂到？這是完全無道 理的代誌。
台灣所有的本土語言早就予聯合國教科文組織列做強欲消失的弱勢語言，只有大量進入教育體系，本土語言才有法度閣活落去。咱會當按呢講，阻止本土語言佇國中必修開課的人，就是企圖欲消滅原住民語、客語、台語等本土語言的兇手。
教育部長蔣偉寧已經毋但一擺佇立法院公開承諾，欲共國中本土語言課程對選修改做必修，這馬煞予課綱修改總綱小組佮領域小組否決，咱期待經過公聽會逐家強烈的表達意見了後，這个承諾會當落實去做。