蘭博館e誕生 / 李 啟 明 /
一座相當雄偉輝煌e蘭陽博物館，今年已經佇宜蘭縣頭城鎮e外圍「烏石港」邊誕生a，這座有藝術感e五、六棧樓建築物，佇遠遠仔看起來，予人感覺有真奇怪e形體，宛然袂輸佇前幾年，有經過921大地動災害受損，規座樓仔siang3落去一窟水蓮花池底，佇遐半浮半沉，予遊客形容ka真趣味，其實，代誌並毋是按呢生，伊e造型完全是一座真媠e博物館，有前瞻性，外觀是經過一位相當有名e建築師，精心設計規劃e傑作，因為伊模仿著佇附近沿海岸邊，攏有奇形岩石生做一層一層斜出海口e模形，設計師將按呢造形模式，借樣移來到烏石港做一種藝術e構想建築物，真自然e排囥蹛水蓮花池邊，配合著池中數粒烏石e景緻，算起來是十全十美，有達到成功e藝術建築境界，予遊客看ka會觸舌，歡喜ka記牢佇頭壳底，念念不忘。
蘭陽博物館是縣府上注重e地標，因為伊是ui濱海線外來入門e要衝，第一站e指標，ia會通代表著宜蘭縣農漁業e出產地，館內底設計完全是符合著古今時代，農村佮漁村e生活，原始由來、人文環境，親像佇庄跤有真濟戶養鴨人家，到播稻時，收冬了後，趕鴨落田抾粟青仔，通節省飼料，鴨仔陣所排瀉e屎尿，予田底增加了有機e肥料作用，翻種時，有肥份存在蹛田塗內底，彼種作穡e過程，攏全部展現佇館內排設。尤其是漁業部分，有魚船出海掠魚e情形，作業形式、鏢魚形態，攏有做模型出來予人看，遊客攏看ka如癡如醉，無想欲離開轉去e款。另外，有一樓是專門佈置深山林內，森林區e樹種，自然生態，親像佇太平山e原始樹木，有松羅、楠仔、樟仔樹、山毛櫸、九芎仔等等，猶閣有真濟講袂tsiau了e樹仔種，攏一一佈置佇各位角落，嘛有小型e生態裝玻璃櫥內，有各種水蛙，十花五色e細尾魚仔佇溪溝仔內底生活，抑有野生e動物仔，親像有果子猫（ba5）、山猐（kionn）仔、猴山仔、鯪鲤（la5-li2）、山豬等等，講不盡e奇形怪狀e動物標本，欲講起來，看ka猶有真濟，記袂tsiau牢佇頭壳底，予li2想嘛想袂tsiau出來。
人文方面相當e濟，有圖字e解說，親像古早佇蘭陽地區是按怎開墾來e，ui頭城e烏石港講起，伊這个所在本晟是有港底，港口通對外通商e一條好港路，因為佇早前e甲子年代有一擺發生天災地變，做風颱所引起e水災，將山頂e規座山塗石lu落來，溪水kong-kong流，ui山坑門衝落來，流落平洋了後，規个港底煞去予伊屯滿沙石，港路ia煞變無去，一寡仔時常有佇遮出入通商e船隻，ia就按呢煞變成無港喙通進入，了後經過久年e消沉，這个所在煞變做無人所到，真稀微。雖然「港口」有一个地名，卻是無親像早前有港口之實，予後代e宜蘭人tiann-tiann佇數念，後來到今馬民主e開放，有一陣熱心e人士，才提起這个烏石港e代誌，欲來閣開港e討論，將過去事實e地名，重新閣再來呈獻佇眾人e面頭前，予人知影，這个人文事跡e故事，一一攏記載蹛館內予人看，早前佇
（1）
遮農漁業佮商業e由來發展史，各所在壁肚頂有排設圖文，古早時代佇港口出入e船隻狀況，予人有一種回想e感覺，早前e情景，船隻e形體，漁村e生活，標題文句說明ka一清二楚。閣再行上頂樓就是農業館，館內有佈置一寡仔早前農家用e工具，親像磟碡（na5-tak8）、割耙（kuak4-pe3）、犁頭、風鼓、鋤頭、鐮歷仔（liam5-lik8-a2）、畚箕、米籮、粟耙等等，猶有奇奇怪怪講不盡e農具用品，嘛有一坵一坵牛佇駛田，人佇播稻仔各種e模型，岸邊閣有配合著一窟水池仔真自然e景觀，予白鴒鷥佮水鴨仔佇遐泅水討食，模樣造型做到完全像真e仝款，予遊客看ka醉茫茫，若親像坐落去水池邊e石頭頂，欣賞著對面e蘆葦草，袂輸簡那看見一遍野外e風景，爽快e心神飛出十三天外，清爽無塊比，予人有一種親像家已進入去大自然e境界，享受著難得有錢無凍買，真媠e好所在。
一樓一樓看完，行到一館有古早味e氣氛所在，忽然有一个老阿伯仔，徛佇對面亭仔跤前，佇彈古早e月琴，身穿破爛褸襤e薄衫，留著頭毛白白、閣喙鬚長長，目神專心佇注意去伊彼支月琴e琴線，認真佇彈彼首有古早味「月夜愁」e歌詩，彼落模樣仝一款，閣來隔壁倚佇亭仔跤e厝內，有一个阿婆仔，佇遐賣碗粿、九層炊、芋粿蹺，閣過彼爿有一个歐巴桑佇開布莊賣布料，沓沓仔行，閣出外面來，有一个歐吉桑，排一擔雜細籠，跍佇遐喝玲瑯賣雜細，探頭ka伊詳細看一下，原來雜細籠擔仔內底，閣囥一寡仔查某人所愛用e胭脂、水粉、雪文、針黹、蓬絲線，各種細項物件，應有盡有，予人感覺真古錐閣真巧趣，踅過後面嘛有人佇弄獅、拍拳頭賣膏藥，鬧熱滾滾，遠遠仔望過去，遐嘛有設一座頭城上介出名e古早味孤棧（koo-tshian2），形體簡那有一寡中年人，佇柱仔中央當拍拚mooh孤柱，拚命想欲足百起去棚頂，採彼支竹篙尾e順風旗，爭取著最後勝利e名譽，予庄頭逐家平安順利，好過日子，遐个孤棚佮這个所有一切e人物景觀，真予人回想著早前e情景，有懷念e感覺，真值得人去追思。
館內所有物件看煞了後，沓沓仔ui頂懸搭電梯落來，下面有一片真大規模e宜蘭縣各鄉、鎮、市e圖景，排佇下跤，欲予人了解，這是佇蘭陽博物館內底有一个宜蘭e整體面貌，做觀後一切e心得。行出大廳門口，面前著有一粒烏石e大石鼓佮一遍真媠e水蓮花，佇等待li2 e光臨佮觀後e暢樂心情，予遊客通得著滿腹e歡喜，予逐家轉去喙笑目笑，一路行過，猶有一寡仔景色，留佇沉底送禮，人講：「好酒沉甕底、待客隨人貯」e意思，這就是欲等li2家已去翕伊e全貌，閣有對面e烏石港佮背後紗帽山做屏障e美麗遠景，予li2有價值通翕相紮轉去做永遠e紀念。
佇 宜蘭 冬山 夜暗
2010年11月 寫作