童玩回春想當年
舊年e熱天ui七月三日到八月十五日止，又閣開始回復著宜蘭童玩節鬧熱e彼種場面起來。想起當年 陳縣長佇執政e時代，伊就有遠見e眼光，有想欲將冬山一帶地區，每年風颱e時期，若會拄著災害時，khah低窟e所在，一四界水淹ka足嚴重e問題，時常會造成水鄉澤國仝一款，有時陣，連紲落雨危害到冬山火車路線一帶，致使到佇行駛中火車受阻礙，結果停駛袂凍通過，因此，這个地區農作物損害也相當厲害。了後，伊將這个所在規劃做成一條非常有效率e排洪水道，這條水道號做「冬山河」，當時也將該河ui頂懸山頂直透到下爿海口，分做三段式上、中、下游，周邊增添觀光設施計劃，一一做到盡善盡美e作用，將爛塗變做黃金、廢地變做貴地e目的。
冬山河水源本來著真豐富，一般下游地帶也有比較其他所在，水勢khah旺盛淡薄仔，因故，將下游建設分做二位觀光地點，南爿勢方面魚塭仔附近，設做古色古香e「國立傳統藝術中心」，內底設施是屬於古典式e台灣古厝貴族庭園以及閩南式e街路精華店舖，古典廟宇、戲台，路邊有賣四秀仔佮小食店，閣過對面下崁跤彼爿有設遊艇小港澳，等待人客欲坐船通往對岸親水公園去沿途遊覽景色，一路上大小遊艇來來去去，交雜無停，遊客不斷e前往親水公園迫迌、樹跤訥涼、池窟仔耍水，看一寡仔外國人佇舞台頂獻歌藝、表演舞蹈劇。
回想當年， 陳縣長接手予游錫堃先生辦理縣政了後， 游縣長便細心運作依照計劃，將冬山河親水公園各項措施，著手公園內開始設備有遊艇港澳，眾人耍水e所在，周邊四圍屯滿懸低e山坡，培植樹林，另外綠地凹窟所在設有一座野外表演舞台，專門欲予遊客觀賞外國來e各種民族舞蹈佮歌唱演技。過去頭幾年仔我會記持開始辦理e時，遊客是人山人海，名聲嚮應海內外，遊覽車、自家用e車輛，規个大型停車場全部爆滿，園區內耍水窟仔獻出多彩花樣，遊客大膽裸出熱天e風格，查某人穿著比基尼e衫仔褲佮三點式e游泳裝、查甫人裸出原始e身材，穿著清涼衣夏e褲，大人囡仔耍ka歡頭喜面、興忘掠狂、暢樂不休、毋知自我e境界，彼幾年仔將安呢規个冬山河帶來無限e聲望四處遠播，宜蘭人開始拍出一條國際路線，將咱台灣國民佮外國朋友做一个友善交流，由安呢奠定了良好e基礎。
佇 劉守成縣長執政時，這个冬山河也有辦過真奢颺e角色，伊佇游縣長退任接過來e工課也袂少，所有園區內e公共設備嘛有沓沓仔完成，尤其是一寡仔遊艇部份，就增加了袂少隻，嘛有太陽能設備e遊艇二隻，小型e遊艇幾若十隻，遮个遊艇對「國立傳藝中心」佮「親水公園」兩岸河面中間，增添了袂少e光彩，對遊客來講，兩岸河內一切交通也真方便，若是坐佇遊艇內也通欣賞著大自然e風景，予遊客飽受眼福、心情清爽，過著熱天清涼一下e好所在。
可惜冬山河有彼種驕傲e聲望，得來是無彼呢仔簡單咧！毋過有一暫仔佇三、四年前煞來停止辦理，嘛予縣民帶來悶悶不樂幾若年，規个冬山河強欲變成無作用e廢園去，園區內一片冷靜、氣色消沉，外口各行各業e商店、民宿區也難以經營落去。好佳哉，佇舊年有了 林聰賢縣長開始接辦，就有按步為營，依照 陳縣長e遺囑交待，將冬山河過去應該做么袂完成e代誌，一一重新做起，起死回生，閣再回復整頓，ui一座失落e表演廳重新搭起鐵架崁帆布，耍水窟仔佈置一寡仔水迷宮、水戰車、水滑梯、水陀螺、迷幻霧宮等等，予大人囡仔興e噴水池來耍，園外冬山河水面頂懸，另外搭一條跨河面兩層e吊橋，下面設置幾若區農村景色e庭園，將河面頂配置到多彩多姿e美景，吊橋頂、吊橋跤，予遊客帶來歡喜心，滿面笑容行過吊橋佮坐自轉車仔來來去去，挨挨陣陣耍ka毋知通煞，這个熱天e氣氛將這个冬山河帶動了空前未有e活熱起來，這就是予宜蘭童玩節將安呢閣再回復了過去失落e風光，揣倒轉來。
這个童玩節自開辦以來，毋但拍開了國際上e知名度以外，對著宜蘭縣也有帶動袂少e經濟繁榮，予經營各行各業e生意人攏心情好kah喙笑目笑，大街小巷鬧熱滾滾，有時陣嘛會予人有一種感覺著，另外變成新e社會不斷佇進步、繁榮。尤其這个童玩節有特別e意義存在，親像園區內有設一座野外劇場，這个劇場通予國內外舞蹈團、歌唱家來表演，發揮著in十七國十八團e民族舞蹈藝術才華，嘛通予遊客飽滿著觀賞e眼福，閣khah通好去靠近外國來e朋友做一份親善友誼，予外國人感受著有一種台灣是豪客之邦、自由國度，人人接受、人人呵咾，有相當國際水準生活e一个好所在，予in轉去通永遠懷念，順機會傳播予逐家知影。
文稿寫于 宜蘭 冬山
李啟明 寫作
俄羅斯2團、英國1團、蘇格蘭1團、斐濟1團、斯洛伐克1團、
日本1團、韓國1團、墨西哥1團、阿根廷1團、芬蘭1團、
印尼1團、土耳其1團、玻利維亞1團、立陶宛1團、古巴1團、
斯里蘭卡1團、馬來西亞1團，等十七個國家來冬山河親水公園表演。